4 fevral 2011 12:11
Bernd Şusterə gözlənilən cəza gəldi
Türkiyə Futbol Federasiyasının Nizam İntizam Komitəsi “Beşiktaş”ın baş məşqçisi Bernd Şusterlə komandanın orta sahə oyunçusu Mehmet Aurelioya sərt cəza kəsib. Azerisport.az xəbər verir ki, buna onların Superliqanın son turunun “İstanbul Büyükşehir Belediyespor” matçındakı hərəkətləri səbəb olub.
Belə ki, baş hakimə söyüş söyən və texniki zonadan qovulan baş məşqçi Şuster 3 rəsmi oyunda komandasının sükanı arxasında ola bilməyəcək. Həmin oyunda qırmızı vərəqə alan Aurelio isə 2 görüşü buraxmalıdı.
Artıq onların hər ikisi bu oyunlardan birinin cəzasını çəkdi. Belə ki, “Gaziantep Büyükşehir Belediyespor”la kubok qarşılaşmasında həm Şuster komandasının başında deyildi, həm də Aurelio forma geyə bilmədi. Şuster qarşıdakı “Kardemir Karabükspor”la ev və “Ankaragücü” ilə səfər görüşlərində də cəzalı olduğu halda, “Fenerbahçe” ilə derbi matçında komandasının sükanı arxasında olacaq.
