6 fevral 2011 11:48
Türkiyənin gündəmində hakim qalmaqalı (FOTO)
Türkiyə Superliqasının dünən keçirilən “Beşiktaş” – “Kardemir Karabükspor” matçında hakim Mustafa Kamil Abitoğlunun verdiyi qərarlar gündəmi zəbt edib. Azerisport.az xəbər verir ki, Superliqanın 20-ci turu çərçivəsində “İnönü” stadionunda baş tutan qarşılaşmada bu hakim 1 yox, 2 yox, ən azı düz 3 nəticəyə təsir edəcək səhvə yol verib.
Məsələ burasındadı ki, qarşılaşmanın 44-cü dəqiqəsində “Karabükspor”lu Emenikenın sağ cinahdan cərimə meydançasına girməyə çalışdığı bir epizodda İbrahim Toramanla birgə yerdə qalmasına rəğmən, hakim davam işarəsi verib. 51-ci dəqiqədə Emenike meydan sahiblərinin qapıçısı Hakan Arıkan ilə cərimə meydançasında üz-üzə gələrkən, təkbətək mübarizədə onun yerdə qalmasına da hakim penalti təyin etmədi.
Matçın ən böyük mübahisə doğuran məqamı isə şübhəsiz ki, 77-ci dəqiqədə “Beşiktaş”lı Almeydanın cərimə meydançası həndəvərindən zərbəsi zamanı gerçəkləşdi. Həmin anda top öncə üst tirə toxunub, qapı xəttini keçsə də, hakimlər həmin anda təmiz qolu hesaba almadılar.
Lakin matçın teleyayımı zamanı və aşağıda gördüyünüz fotolarda da aşkar görünür ki, hakimlər böyük səhvə yol veriblər.
