7 fevral 2011 14:02
Sadıqovun şahidlik etdiyi dünyanın ən uzun plakatı (FOTO)
Millimizin kapitanı Rəşad Sadıqovun komandası olan “Eskişehirspor”un dünən Türkiyə Superliqasının 20-ci turu çərçivəsində “Galatasaray”la səfər matçında maraqlı bir olay yaşanıb. Azerisport.az xəbər verir ki, meydan sahiblərinin azarkeşləri “Türk Telekom Arena”nın tribunalarına 315 metrlik plakat asıblar ki, bu da dünyanın ən uzun plakatı kimi tarixə düşüb.
“Galatasaray” tərəfdarları, bu mövsüm alınan pis nəticələrə rəğmən, komandalarına məhz bu şəkildə dəstək verdiklərini nümayiş etdiriblər. Azarkeşlərin asdığı 315 metrlik plakatda bunların yazıldığı bildilir: “106 illik tarixi, kimsənin yanına belə yaxınlaşa bilmədiyi saysız-hesabsız uğurları, muzeyində rəqiblərinin iki qatı qədər kuboku olan ilk və təklərin komandas, olduğu gündən bəri türk olmayan komandaları ən çox yenən türk komandası, ölkəsinin iftixarı, UEFA Kuboku və Superkubok sahibi, dünyanın ən böyük tərəfdar qrupu “Ultraslan”ın qüruru, 1481-dən bəri mədəniyyətin simvolu, 1905-dən bəri idmanın beşiyi, şanlı Galatasaray”!
Qeyd edək ki, bu günə qədər bilinən ən uzun plakat 290 metr olmaqla “Barcelona”nın azarkeşlərinə aid idi. Yeri gəlmişkən, "Galatasaray"lıların bu şüarına millimizin kapitanı Rəşad Sadıqov da yaxından şahidlik edib. Lakin o, "sarı-qırmızılar"a 2:4 hesabıyla məğlub olduqları görüşdə forma geyinməyib.
