7 fevral 2011 15:47
"XL-ın təklifindən imtina etməyə heç bir səbəb tapa bilmədim"
“Xəzər Lənkəran”ın yeni transferlərində olan Syerra-Leone yığmasının yarımmüdafiəçisi Julius Vobay azerisport.az saytına müsahibəsində Rumıniyanı Lənkərana dəyişməsindən, gələcək karyerasından, yığmadakı çıxışından və “Neftçi” ilə qarşıdakı oyundan danışıb.
- Rumıniyada sizin üçün elə pis idi ki, Lənkərana gəlməyə qərar verdiniz?
- Xeyr. Sadəcə, 4 illik Rumıniya karyeramın ardından qərar verdim ki, müəyyən dəyişikliklərə ehtiyac var. Mirça Rednik məni “Xəzər Lənkəran”a dəvət etdi və mən bu təklifdən imtina etməyə heç bir səbəb tapa bilmədim.
- Təsadüfən siz bura sırf Mirça Rednikə görə gəlməmisiz?
- Ancaq ona görə gəlməmişəm. Mən onu heç şəxsən tanımırdım. Rednik Buxarest “Dinamo”sunda çalışanda mən onun komandasına qarşı çıxış etmişdim. Yaxşı məşqçidi.
- Bura gəlməmişdən öncə Azərbaycan futbolu haqda nə bilirdiz?
- “Xəzər Lənkəran” haqda mənə kifayət qədər məlumat veriblər. Həmçinin mənim həmyerlim, “Bakı”da çıxış edən İbrahim Karqbo da komandam haqda xoş sözlər bildirdi. Hamı bu komandanın azarkeşlərini tərifləyirdi.
- 12 qolla yığmanızın ikinci əsas bombardiri hesab olunursuz. Qorxmursuz ki, bura gəlişinizdən sonra sizi unudarlar?
- Mən Syerra-Leone yığmasında həmişə oynamışam və bundan sonra da nəsə maneə ilə üzləşəcəyimi düşünmürəm.
- Hamıya məlumdu ki, siz keçmiş klubunuzda yarımmüdafiə və hücum xəttində forma geyirdiniz. XL-da hansı mövqedə oynayacaqsız?
- Hər şey baş məşqçimizin sistemindən asıldı. Komandanın hansı taktikayla çıxış etməsini o müəyyənləşdirir. Mən həm sağ, həm də sol cinahda çıxış edə bilirəm. Mənim üçün elə də ciddi fərqi yoxdu.
- Lənkəran klubuna keçərkən dərhal bildirmisiz ki, bu mövsüm qızıl medallara sahib çıxmaq istəyirsiz. Bu, sadəcə standart biz sözdü, yoxsa?
- Mən komandamızı iş başında görmüşəm və bilirəm ki, buna nail ola bilərik.
- Yəqin bilirsiz ki, sizdən yuxarıda qərarlaşan komanda da sıradan rəqib deyil...
- Təbii ki, hər şey sadə deyil. Ancaq gördüyüm qədərilə, “Neftçi” bizi sadəcə 1 xal qabaqlayır.
- Yeri gəlmişkən, elə həftənin sonu liderlə oyununuz var...
- Başa düşürəm ki, bu oyun bizim azarkeşlərimiz üçün çox vacibdi. Ancaq biz sadəcə “Neftçi” ilə oyuna hazırlaşmamışıq. Biz bütün komandalara hörmətlə yanaşırıq və bizim üçün kiminlə oynamağımızın ciddi fərqi yoxdu. Çalışacağıq ki, hamısına qalib gələk.
- Nə əcəb “Neftçi”ni xüsusi qeyd etmirsiz? Axı bu, “Xəzər Lənkəran”ın ən prinsipial rəqibidi...
- Mən hələ bu komanda haqda çox da informasiyaya malik deyiləm. Odu ki, onlara da digər rəqiblərimiz kimi yanaşıram.
