7 fevral 2011 17:55
Neftçi yeni transferlərini təqdim etdi (FOTOLAR)
Qış transfer pəncərəsində "Neftçi"nin rənglərinə bağladığı üç yeni futbolçu öz formalarına qovuşub. Azerisport.az xəbər verir ki, klubun bazasında baş tutan tədbirdə "Neftçi" PFK-nın prezidenti Sadıq Sadıqov da iştirak edib.
Mərasimdə braziliyalı Rodriqinyoya flaqmanın 7, Yasin Himaya 4, Vitali Kovalyova isə 34 nömrəli forması təqdim edilib.
Klub prezidenti Sadıq Sadıqov tədbirdə öz fikirlərini bildirib: “Əvvəlcə, mən sizi "Neftçi" ailəsinin yeni üzvləri olmağınız münasibətilə təbrik edirəm. Biz "Neftçi" olaraq güclü yerli futbolçularla yanaşı, səviyyəli legionerlərin transferini həll etməyə çalışırıq. Gündən-günə inkişaf edən Azərbaycan futboluna öz töhfəmizi vermək və komandamızın böyük uğurlar qazanması üçün lazım olan hər şeyi edirik. Mən inanıram ki, qış fasiləsində heyətimizə qoşulan futbolçular komandamızın gücünə güc qatacaq. Həyata keçirilən bu transferlər oyunlarımıza azarkeş marağını da artıracaq".
Braziliyalı futbolçu Rodriqinyo "Neftçi"yə transferini dəyərləndirib: "Mən ilk dəfədi ki, legioner həyatı yaşayıram. Burada uğur qazanmaq üçün əlimdən gələni edəcəm. Bilirəm ki, mənə böyük ümidlər bəslənilir. "Neftçi"də həmyerlilərimin çıxış etməsi də keçidimə təsir etdi. Bu forma ilə çempionluq sevinci yaşamaq istəyirəm".
Əlcazairəsilli Yasin Hima da yeni komandası haqqında fikirlərini bildirib: “Buraya gəldikdə komandanın baş məqşçisi mənə klubun hədəflərindən danışdı. "Neftçi"nin bu hədəflərə çatması üçün, meydanda öz sözümüzü deyəcəyik. Bilirəm ki, komanda da böyük rəqabət var. Belə rəqabətin olması, ancaq bizim xeyrimizədir".
Flaqmana transfer olunan təcrübəli qolkiper Vitali Kovalyovda "Neftçi"yə transferi barədə ürək sözlərini deyib: "Mən Azərbaycanın ən böyük klubuna transfer olunmuşam. "Neftçi" hər bir azərbaycanlı futbolçunun forma geymək istədiyi klubdur. Burada ancaq bir hədəf var: ancaq birinci olmaq. Komandamın çempion olması üçün mən də, şans verildiyində üzərimə düşən vəzifənin öhdəsindən layiqincə gələcəm".
