8 fevral 2011 17:52
“İşimiz əsas komanda üçün futbolçu yetişdirməkdi”
Azerisport.az sizi "Neftçi" PFK-nın icraçı direktoru Mübariz Xudiyevin müsahibəsi ilə tanış edir.
- "Neftçi"nin əvəzedici heyəti artıq 2-ci dəfədi ki, təlim-məşq toplanışı üçün Rusiyanın Krımsk şəhərinə yollandı. Hazırlıq mərhələsi necə keçdi?
- Düzdü, əvəzedici heyət 2009-cu ildə Arif Əsədovun başçılığı altında artıq Krımskda təlim-məşq toplanışında olub. Həmin il ilk dəfə Əsədovun rəhbərlik etdiyi dövrdə, komandamız Azərbaycan çempionu adını qazandı. Onu da qeyd edək ki, bu il Azərbaycanın Premyer Liqa klublarının əvəzedici heyətləri arasında, yeganə olaraq "Neftçi" ölkə xaricində toplanış keçdi. Hazırlıq mərhələsindən çox razı qaldıq. Əvəzedici heyətə belə bir şərait yaratdığı üçün "Neftçi" PFK-nın prezidenti Sadıq Sadıqova minnətdarlığımızı bildiririk. Bizim üçün yaradılan şərait yüksək səviyyədə idi. Rusiyada 4 yoxlama görüşündə qüvvəmizi sınadıq. "Spartak Nalçik", "Kuban", "Krasnodar" kimi komandalarla oyun keçirdik. 4 görüşdən 2-də qalib gəldik, qalan 2 oyunu isə heç-heçə ilə bitirdik. Təlim-məşq toplanışında yeni futbolçuları baxışa dəvət etmişdik, onlar özlərini yaxşı tərəfdən göstərməyi bacardılar.
- Hal-hazırda qızıl medalları qazanan əvəzedici heyətdən 6 futbolçu "Neftçi"nin əsas heyətində çıxış edir. İndiki əvəzedici heyətdən əsas komanda da çıxış etmək iqtidarında olan futbolçular varmı?
- Əlbəttə, bizim əsas işimiz əsas komanda üçün futbolçu yetişdirməkdi. Hazırda əvəzedici komandanın 15 yaşlı əsas qapıçısı sayılan Əyyub Əliyev əsas heyətlə Antalyada, təlim-məşq toplanışında iştirak etdi. Həmçinin hazırkı, heyətdə çıxış edən Kərim Diniyev və "Neftçi"nin həvəskarlar komandasından cəlb etdiyimiz Malik Babayev əsas komanda ilə Türkiyəyə ikinci toplanışa çağırılmışdı. Eltun Yaqublu isə artıq keçən ildən əsas komandaya cəlb olunub. Bizim komanda əsasən 1992-94-cü il təvəllüdlü gənc futbolçulardan ibarətdi.
- Bu mövsüm tamamı ilə yeni qurulan bir heyət və baş məşqçi İqor Getmanın fəaliyyəti rəhbərliyi qane edirmi?
- Qeyd etdiyim kimi, əvəzedici heyətin əsas məqsədi ondan ibarətdi ki, əsas komanda üçün futbolçu yetişdirsin. Bunun üçün, bizim əvəzedici heyətimizə rəhbərlik edən təcrübəli məşqçilər korpusu, bütün mövqelərə perspektivli futbolçular cəlb edir. Hazırda turnir cədvəlində üst sıralarda olmamağımız isə mövsümün əvvəlində yeni heyət formalaşdırmağımızla əlaqədardı. Bizim əvəzedici heyətimizi digər komandalarla müqayisə etdikdə, "Neftçi"nin əvəzedicilərinin əsas komandaya daha çox cəlb olunduğunu görərik. Rəhbərliyin dəvəti ilə əvəzedici heyətdə Elbrus Məmmədov, Zaur Tağızadə, Hüseyn Məhəmmədov kimi mütəxəssislər çalışır. Birinci divizionun lideri "Abşeron"da 6 gənc futbolçumuz çıxış edir. Həmçinin "Şəmkir", "Simurq", MOİK, "Şuşa" klublarında da futbolçularımız əsas heyət üzvləridi. 5 futbolçumuz U-19 yığmasına çağırılıb. Sevindirici haldı ki, onlardan 2-nin 16 yaşı var. U-21 yığmasında çıxış edən gənc futbolçularımız da var.
- "Neftçi"nin əvəzedici heyətində, U-17 komandasında, hər zaman yeni istedadlar, perspektivli gənclər üzə çıxır. Bunlar seleksiya işlərinin güclü qurulması ilə əlaqədardı?
- "Neftçi" adı gənc futbolçular üçün bir stimuldu, çünki Azərbaycanda oynayan hər bir futbolçunun arzusudu ki, "Neftçi"də çıxış etsin. Biz öz növbəmizdə çalışırıq ki, onlara hər cür şərait yaradırıq ki, gələcəkdə onlardan yaxşı futbolçu yetişsin. "Neftçi"nin U-17-nin əsas vəzifəsi odu ki, əvəzedici heyətə futbolçu versin. Bu mövsümün əvvəlində 7 futbolçu U-17 heyətindən, 5 nəfər isə həvəskarlardan ibarət komandamızdan birbaşa əvəzedici heyətə cəlb olunub.
Mənbə: "Neftçi"nin rəsmi saytı
