8 fevral 2011 21:37
Emil Mpenzanın qayıdacağı tarix müəyyənləşdi
Türkiyədə təlim-məşq toplanışında zədə alan "Neftçi"nin belçikalı hücumçusu Emil Mpenza, vətənində uğurla əməliyyat olunub. Azerisport.az xəbər verir ki, Mpenzanı əməliyyat edən həkimin bildirdiyinə görə, tezliklə fərdi məşqlərə başlayacaq futbolçu 6 həftəyə yaşıl meydanlara dönəcək. Bu haqda açıqlama verən Mpenza aşağıdakıları dilə gətirib:
“Artıq zədə ilə bağlı problemi əməliyyat olunaraq arxada qoymuşam. Cərrahiyyə əməliyyatı uğurla başa çatdı. Həkimlərin rəyinə görə, 6 həftəyə yaşıl meydanlara dönəcəm. Mənim əsas təəssüfləndiyim məqam bu müddətdə "Neftçi"yə kömək edə bilməməyimdi. Bizi növbəti turda vacib görüş gözləyir. "Xəzər Lənkəran"la oyunda komanda üzvlərinin var güclərini ortaya qoyaraq qələbə qazanacaqlarına inanıram. "Neftçi"nin heyətində yüksək səviyyəli futbolçular yer alır. Onların mənim yoxluğumu unutduracağına əminəm. Buradan "Neftçi" azarkeşlərini bu əhəmiyyətli oyuna səsləyirəm. Qoy, onlar komandamızı sona qədər dəstəkləsinlər. "Neftçi" "Xəzər Lənkəran"la oyunda qələbə qazanaraq, çempionluq yolunda daha bir əngəli arxada qoyacaq. Mən də tezliklə flaqmanın düşərgəsinə qayıdaraq vuracağım qollarla onları yenidən sevindirəcəm".
