8 fevral 2011 11:34
“Komandanı Premyer Liqaya hazır hesab edirəm”
"Bakı” 2011-ci ilin 16 yanvar - 4 fevral tarixləri arasında Antalyada qış təlim-məşq toplanışında oldu. Azerisport.az xəbər verir ki, komandanın məşqçisi Novruz Əzimov Antalyada keçirilən hazırlıq prosesinin yekunları ilə bağlı müsahibə verib:
- Yeni ildə komandamızda baş məşqçi dəyişikliyi baş verdi. Antalyada keçirilən toplanışı komanda üçün uyğunlaşma baxımından ilk sınaq adlandırmaq olarmı?
- Əsas diqqətimiz fiziki gücün artırılması və müxtəlif təmrinlər üzərində qurulmuşdu. Futbolçuların fərdi ustalıq və fiziki keyfiyyətlərinin təkminləşdirilməsi ilə bağlı bir sıra irəliləyişlər əldə etdik. Təlim- məşq toplanışını uğurlu adlandırmaq olar.
- Futbolçuların fiziki durumundan razısınızmı?
- Hər bir futbolçunu istər taktiki, istər fiziki planda incələmişik. Antalyada beş yoldaşlıq oyunu keçirdik . Futbolçuların hamısına oynamaq imkanı verdik. Bu oyunların 3-də qələbə qazandıq, ikisini isə heç-heçə başa vurduq. Əslində nəticənin bizim üçün əhəmiyyəti yox idi. Önəmli olan kollektivin hər bir üzvünün hazırlığına qiymət vermək idi. Funksional cəhətdən komandanı Premyer Liqaya hazır hesab edirəm.
- Komandamızın oyununda taktiki cəhətdən bir sıra yeniliklər sezilir.
- Əsas diqqət kollektiv hücuma ayrılır. İstəyimiz hər bir futbolçunu hücumda və ya müdafiə vəziyyətində nə etməli olduğunu, konkret hallarda necə hərəkət etmələrini aşılamaqdan ibarətdi.
- Baş məşqçi Aleksandr Starkov barədədə hansı fikirləri söyləyə bilərsiniz?
- Starkov təcrübəli məşqçi və eyni zamanda nizam-intizamı sevən başçıdı. Onu tanıdığım ilk gündən nizam-intizam və funksional-taktiki hazırlığı əsas tutduğunun şahidiyəm. Onun rəhbərliyi ilə "Bakı"nın yaxın illərdə böyük nailiyyətlər əldə edəcəyi qənaitindəyəm.
