8 fevral 2011 00:12
Joze Mourinyo üçün daha bir mükafat
İtaliya çempionatının 2009/10 mövsümü üçün ən yaxşı məşqçilərin kimliyi müəyyənləşib. Azerisport.az xəbər verir ki, elə ölkədə çalışan məşqçilərin səs çoxluğu ilə müəyyənləşən “Qızıl skamya” mükafatının qalibi adına hazırda İspaniyanın “Real” (Madrid) klubunu çalışdıran, ötən mövsüm isə Milan “İnter”inin sükanı arxasında olan Joze Mourinyo layiq görülüb.
Qeyd edək ki, portuqaliyalı mütəxəssis ötən mövsüm İtaliya klubu ilə ölkə çempionluğunu və kubokunu qazanmış, həmçinin Çempionlar Liqasının qalibi olmuşdu. Mourinyo bu mənada ötən mövsümkü rəqiblərindən olan “Juventus”lu Luici Del Neri ilə “Roma”nın baş məşqçisi Klaudio Ranyerini qabaqlayıb. Bu mütəxəssislər müvafiq olaraq ikinci və üçüncü olublar.
Maraq üçün onu da xatırladaq ki, Mourinyo bu ilin əvvəlində FİFA tərəfindən 2010-cu ilin ən yaxşı məşqçisi seçilmişdi. UEFA-nın rəsmi saytının oxucuları arasındakı sorğuda da qalib olan portuqaliyalı mütəxəssis İtaliya Futbol Assosiasiyası tərəfindən də “Oscar del Calcio” mükafatını qazanmışdı.
