9 fevral 2011 20:38
Rəşad Sadıqovun Qarabağ`a qayıdışı təsdiqləndi
Azərbaycan yığma komandasının kapitanı Rəşad Sadıqov vətənə dönür. Azerisport.az xəbər verir ki, təcrübəli müdafiəçi hazırda çıxış etdiyi Türkiyənin “Eskişehirspor” klubuna keçənə kimi top qovduğu “Qarabağ”a qayıdır.
Ağdam klubunun direktoru Əmrah Çəlikəlin saytımıza verdiyi məlumata görə, artıq Sadıqovun qayıdışı ilə bağlı bütün məqamları razılaşdırıblar. Həmçinin “Eskişehirspor”un baş məşqçisi Bülənt Uyğunun da keçidlə bağlı razılığı alınıb. Qeyd edək ki, Çəlikəl ilə yanaşı ağdamlıların baş məşqçisi Qurban Qurbanov da hazırda Eskişehirdə bu keçidin tam həlli ilə məşğuldular.
“Hər kəs başa düşür ki, ən yaxşı variant hazırda Rəşadın “Qarabağ”a dönüşüdü. Biz Sadıqovu tam şəkildə almaq istəyirik. Yəni burda hansısa icarədən söhbət getmir. İstisna deyil ki, biz qarşı tərəfə buna görə pul da ödəməli olacağıq” – deyə Çəlikəl bildirib.
Qeyd edək ki, Sadıqovun qayıdışı ilə bağlı bütün məqamlara artıq sabah aydınlıq gələ bilər. Rəşad millinin düşərgəsindən birbaşa Eskişehirə dönəcək və tərəflərin qarşılıqlı danışıqlarından sonra yekun qərar veriləcək.
