9 fevral 2011 12:02
Toni Adams: O, istedadlı futbolçudu, amma...
Premyer Liqanın 20-ci turu çərçivəsində fevralın 13-də səfərdə “Qarabağ”la qarşılaşacaq “Qəbələ” hazırlıqlarını davam etdirir. Azerisport.az xəbər verir ki, gündə iki dəfə məşqə çıxan komandanın heyətində itkilər olmasa da, Saşa Yunisoğlunun dünənki məşqdə belində ağrılar hiss etməsi onun “Qarabağ”la oyunda çıxışını sual altında qoyub.
Matç öncəsi kollektivdəki ab-hava ilə bağlı fikirlərini açıqlayan baş məşqçi Toni Adams yeni transferlərin durumunu da dəyərləndirib: “Komandada yüksək psixoloji durum hökm sürür. Hamı üzərinə düşən məsuliyyəti dərk edir. Futbolçularım səylə çalışırlar. Yeni transferlərin kollektivə qatılması heyətdəki rəqabəti artırıb. Onlar artıq komandaya uyğunlaşıblar. O ki qaldı onların növbəti matçda oynayıb-oynamayacağına bunu futbolçuların özləri müəyyənləşdirəcəklər.
Kollinz hələ fiziki olaraq tam hazır deyil. Amma onun qarşıda iki günü var. Özünü yaxşı tərəfdən göstərə bilsə ona şans verə bilərəm. Banqura psixoloji və fiziki baxımdan hazırlıqlı görünür. Böyük ehtimalla növbəti 3 qarşılaşmada ondan yararlanacağıq. Nuran Qurbanov “Qəbələ”nin gələcəyinə hesablanmış transferdi. İstedadlı futbolçudu, amma təcrübəsi az olduğuna görə onun xidmətindən məhdud istifadə edəcəyəm. Murad Hüseynovun durumunu isə yığma komandanın düşərgəsindən hansı vəziyyətdə dönməsinə görə dəyərləndirəcəyik.”
