9 fevral 2011 00:33
Kamran Ağayev: Foqts guya nə vaxt razı qalıb ki?
Futbol üzrə yığma komandamızın və “Xəzər Lənkəran”ın qapıçısı Kamran Ağayev azerisport.az saytına müsahibə verib.
- Yığmamızın baş məşqçisi Berti Foqts futbolçulardan narazı olduğunu deyir. Onun sözlərinə görə, komandamız müdafiədən hücuma gec keçir...
- Foqts guya nə vaxt razı qalıb ki? O, həmişə narazıdı. İşləmək lazımdı, vaxta ehtiyac var. Əgər məşqçi razı qalsaydı, onda nəticə olmazdı ki.
- O, əsasən müdafiədən hücuma ləng keçməkdnə narazıdır. Foqtsun fikrincə, futbolçular meydanda tez qərar qəbul etmirlər...
- İşləmək lazımdır. Birdən-birə heç nə olmur. Öz üzərimizdə işləməliyik və buna vaxt lazımdır. Məşqçi həmişə narazı olur. İnşallah, işləyərik, nəticə əldə edərik və bizdən razı olar.
- Oyunlardakı eksperimentlər nəticə qazanmağa maneə olmur ki?
- Millidəki oyunçuların hamısı təcrübəli, ağıllıdırlar. Bura elə-belə, təsadüfi futbolçular gəlmir. Həm də əvəzolunmaz futbolçu yoxdu. Bütün oyunçular matça hazırdılar. Ola bilər ki, gənc futbolçular özlərini bir qədər yad yerdə hiss edirlər. Ancaq bu da normal bir haldı.
- Qarşıdakı oyunda hansı nəticəyə ümid edirsiz?
- Bütün oyunlarda rəqibdən asılı olmayaraq, qələbə üçün çalışıram.
- Macarıstan yığması üzərində qələbəmiz realdı?
- Özümə inanmasaydım, meydançaya çıxmazdım. Allah eləsin ki, qələbə qazanaq.
- Rəqibin hücumçularından hansıları xüsusi qeyd edə bilərsiz?
- Mən düzünü desəm onlar yox, komandam haqda düşünürəm. Öz oyunumuz daha vacibdi. Yaxşı oynasaq, qələbə də qazana bilərik.
- Həftəsonu Premyer Liqa çərçivəsində “Neftçi” – “Xəzər Lənkəran” görüşü baş tutacaq. Paytaxt klubunun üzvləri ilə “Böyük oyun” haqda danışırsızmı?
- Mən hələlik yığmadayam və başqa nəsə danışmaq istəmirəm. Amma belə “Neftçi”nin oyunçuları ilə düşmən deyiləm. Millinin hazırlıq prosesində də onların heç birinə düşmən gözüylə baxmırıam. Biz hamımız dostuq. “Neftçi” ilə oyun haqda isə düşünmürəm. İndi sadəcə yığma komandanı, sabahkı oyunumuzu düşünürəm. Nə vaxt klublarımızın heyətində meydanda üz-üzə gəlsək, onda artıq qardaş olmayacağıq.
