10 fevral 2011 13:27
XL-la derbi öncəsi fanatlarla görüş və qələbə vədi
"Xəzər Lənkəran"la derbi öncəsi "Neftçi" rəsmiləri və futbolçular "Flaqman" və "UltraNeftçi" fan-klublarının ofisinə baş çəkərək, fanatlarla görüşüblər. Azerisport.az xəbər verir ki, görüşdə "Neftçi"nin vitse-prezidenti Tahir Süleymanov, baş məşqçi Arif Əsədov, futbolçular - yeni transfer, braziliyalı Rodriqinyo, özbəkistanlı bombardir Bahodir Nasimov, makedoniyalı Slavko Georgievski, Cavid İmamverdiyev və Ruslan Qurbanov iştirak edib.
"Neftçi"nin vitse-prezidenti Tahir Süleymanov çıxışında klub prezidenti Sadıq Sadıqovun azarkeşlərə komandanın hər zaman yanında olduqları üçün təşəkkürünü çatdırıb. Həmçinin, vitse-prezident klub fanatlarından oyunun əsl derbi ab-havasında keçməsi üçün tribunaları doldurmasını istəyib. O, azarkeşlərə yaşıl meydanda 90 dəqiqə gərgin mübarizənin olacağını, güclü olanın qalib gələcəyini bildirib. Tahir Süleymanov belə vacib oyunda fanatların rolunun danılmaz olduğunu, onların komandanın 12-ci oyunçusu olduğunu qeyd edib.
Flaqmanın baş məşqçi Arif Əsədov çıxış edərək, təlim-məşq toplanışı barədə məlumat verib və keçdikləri yüksək səviyyəli hazırlığın komandanın oyununda özünü əks etdirəcəyini bildirib. Futbolçular isə çıxışları zamanı azarkeşlərə təşəkkür edərək, onlardan qarşıdakı oyunlarda dəstək istəyiblər.
Flaqmanın təcrübəli futbolçularından makedoniyalı Georgievski meydanda azarkeşlərə görə mübarizə apardıqlarını, qələbəni onlara görə qazandıqlarını bildirib.
Komandanın bombardiri Bahodir Nasimov da "ağ-qara" rənglərə könül verənlərə "Xəzər-Lənkəran"la oyunda kimin qol vurmasından asılı olmayaraq, qələbə qazanacaqlarına söz verib.
Azarkeşlərlə görüşdə "Flaqman" və "UltraNeftçi" fan-klublarının rəhbərləri Ceyhun Bədəlzadə və Ceyhun Əzizli çıxış edərək, komandaya uğurlar arzu ediblər. Onlar "Xəzər Lənkəran"la oyunda komandanın qələbə qazanmasını arzuladıqlarını, lakin bu matçın hər şeyin sonu olmadığını bildiriblər. "Neftçi"nin oyunçuları isə "Xəzər Lənkəran"la derbidə fanatlara qələbə sözü veriblər.
