11 fevral 2011 13:37
Rauf Əliyev: Belçikada xal qazana bilərik
Azərbaycan yığmasının və “Qarabağ”ən forvardı Rauf Əliyev azerisport.az saytına müsahibəsində Dubay toplanışından və Macarıstana məğlubiyyətdən danışıb.
- Yığmanın Macarıstana yenilgisini necə şərh edərdiniz?
- Rəqibin necə proqressiv futbol sərgilədiyi göz önündə idi. Biz qələbə qazanmaq istəyirdik. Ancaq oyunumuz alınmadı. Biz çox qaçdıq. İkinci hissədə hətta iki qol vəziyyətimiz də oldu. Lakin bu, uğur qazanmaq üçün yetərli deyil.
- Niyə millimiz hücumda bu qədər dişsizdi? Standart vəziyyətlərdən başqa macarların qapısı önündə təhlükəli vəziyyət görmədik...
- Hücumçuya lazım olan ötürmələr yox idi, hansı ki, biz gözləyirdik. Belə vəziyyətdə də hücumçulara nəsə etmək çox çətindi.
- Yığma mərkəzdə demək olar ki, yaradıcısız oynayırdı...
- Düzdü, bizdə orta sahədə yaradıcı fiqur yox idi. Biz sadəcə o haqda düşünürdük ki, rəqibin oyununu necə pozaq. Belədə necə təhlükə yarada bilərdik? Hücumçu topu ələ keçirmək üçün geri qayıdır, ondan sonra hücuma atılır. Belə çox çətindi.
- Belə oyunla Brüsseldə nəyə ümid edə bilərik?
- Əgər yaxşı hazırlaşa bilsək, oyun öncəsi taktikamızı dəyişə bilsək, nəsə edə bilərik. Məsələn, heç-heçəyə nail olmaq mümkündü.
- Macarlarla görüşü belçikalı məşqçilər də izləyirdi...
- Yığma klub deyil və heç vaxt eyni oyunu sərgiləyə bilməz. Ola bilər ki, elə məhz Belçikadakı görüşdə tam fərqli oyun göstərək.
- Rəşad Sadıqovun qayıdışı sizin Azərbaycan çempionatında uğur qazanmağınıza nə dərəcədə kömək ola bilər?
- Bu, onun tərəfindən klubumuza çox böyük kömək olacaq. Onun “Qarabağ”dakı çıxışını hamı görüb. İnanıram ki, onun gəlişi ilə biz çempionluq uğrunda da mübarizə apara biləcəyik.
