11 fevral 2011 16:29
Aleksandr Starkov: Bütün bacarığımızı ortaya qoyacağıq
Azərbaycan Premyer Liqasının 20-ci turunda "Muğan"ı qəbul edəcək "Bakı" bu oyunun hazırlıqlarını başa vurmaq üzrədi. Azerisport.az xəbər verir ki, bu arada komandanın baş məşqçisi Aleksandr Starkov komandanın hazırkı durumunu dəyərləndirib.
- Komanda barədə ilkin təəssüratlarınızı bilmək maraqlı olardı?
- Komanda ilə təlim-məşq toplanışı zamanı tanış oldum. Vaxtımız az olsa da, kifayət qədər məlumat toplaya bildim. Komanda barədə fikrim müsbətdi. Oyunçuların davranışı, əzmkarlığı, mehribaçılıq və kollektiv xarakter nümayiş etdirməsi ürəyimcədi.
Görülməli çox işlər var. Antalyada keçirdiyimiz təlim-məşq toplanışı zamanı bütün müsbət və mənfi cəhətlərimizi öyrənməyə çalışdıq. Zəif nöqtələrimizi müəyyən edib, həm taktiki, həm də funksional hazırlıq üzərində çalışmalarımızı davam etdirəcəyik.
- Sizi narahat edən amillər varmı?
- Bir neçə futbolçumuzun zədəli olması məni qayğılandırır. Əsasən də, Stefan Borbikoni və Ernad Skuliçin sıradan çıxması bizim üçün ciddi itkidi. Hər ikisi əsas heyətin oyunçularıdı və il boyu demık olar ki, bütün oyunlarda meydana çıxıblar. Boşluq yaranmaması üçün müxtəlif variantları nəzərdən keçirirəm.
Eyni zamanda Aqil Məmmədov, Vaqif Cavadov və Fabio Luis Ramim milli komandanın düşərgəsində olduqlarından komanda ilə birgə hazırlaşa bilməyiblər. Onlar yalnız bu gün bizə qoşulublar. Bu da bizim üçün çətinlik yaradan amillərdən biridi.
- Milli komandadan söhbət düşmüşkən, Latviya - Boliviya oyunu barədə nə deyə bilərsiniz?
- Oyun çox xoşuma gəldi. Hər iki komanda sürətli və hücumameylli oyun nümayiş etdirdi. Sevindirici cəhət bu oldu ki, biz qalib gəldik. Latviya millisi səviyyəli oyun göstərdi. Boliviya güclü komandadı. Təkcə Donetsk "Şaxtyor"undan tanıdığımız Morenanın adını çəkmək kifayətdi. O, dünyaca tanınmış oyunçulardan biridi. Belə güclü rəqibə qalib gəlməklə bir daha milli komandamızın iddialı olduğunu ortaya qoyduq. Oyun və nəticədən razı qaldım.
- Sabahkı rəqibimiz barədə nə deyə bilərsiniz?
- "Muğan" ciddi rəqibdi, bunu söz xatirinə demirəm. Onlar birinci dövrədə bizdən 3 xal alıblar, məncə elə tək bu fakt "Muğan"ın güclü komanda olduğunun göstəricisi kimi qəbul oluna bilər. Bu komandaya qalib gəlmək üçün bütün gücümüzü səfərbər etməliyik. Bilirəm ki, klubumuzun rəhbərliyi və azarkeşlərimiz bizdən yalnız qələbə gözləyirlər. Sizi əmin edirəm ki, sabah qalib gəlmək üçün bütün bacarığımızı ortaya qoyacağıq.
Mənbə: "Bakı"nın rəsmi saytı
