12 fevral 2011 17:28
“Ürəyim dözmədi, XL ilə oyuna görə Bakıya gəldim”
"Neftçi"nin litvalı qapıçısı Paulius Qribauskas Bakıya qayıdıb. Azerisport.az xəbər verir ki, zədəsini vətənində müalicə etdirən 27 yaşlı qolkiper bunun səbəbini də açıqlayıb:
"Bilirsiniz ki, bir müddət əvvəl diz nahiyəmdən cərrahiyyə əməliyyatı keçirmişəm. Müalicəmi vətənimdə davam etdirirdim. Həkimlər əməliyyatdan təxminən 6 ay sonra tam hazır ola biləcəyimi deyiblər. Bununla belə, ürəyim dözmədi, "Xəzər Lənkəran"la olduqca əhəmiyyətli oyunda "Neftçi"nin yanında olmaq istədim və buna görə də Bakıya gəldim. Çox istərdim ki, bu vacib görüşdə komandama kömək edim. Amma təəssüf ki, bu mümkün deyil. İnanıram ki, "Neftçi" sabahkı qarşılaşmada qələbə qazanaraq, çempionluq yolunda böyük bir addım atacaq" – deyə o, klubunun rəsmi saytına açıqlamasında bildirib.
