13 fevral 2011 19:00
“Çoxlu qol imkanları olmasa da, taktiki futbol getdi”
Premyer Liqanın qış fasiləsindən sonrakı ilk – 20-ci turunun “İnter” – “Simurq” matçından sonra hər iki komandanın baş məşqçisi oyunla bağlı münasibətlərini açıqlayıb. Azerisport.az xəbər verir ki, paytaxt klubunun 2 cavabsız qolla qalib gəldiyi görüşdən sonra çalışdırıcılar bunları dilə gətirib:
Qyoko Haciyevski, "Simurq"un baş məşqçisi: "Maraqlı oyun alındı, çoxlu qol imkanları olmasa da, taktiki futbol getdi. Futbolçularımız rəqibə qarşı yaxşı mübarizə apardı. Bir neçə futbolçumuz zədə səbəbindən bugünkü qarşılaşmada oynamırdı. "İnter" bizdən daha təcrübəli idi, daha yaxşı idi. Bir neçə qol imkanımız olsa da, bundan yararlana bilmədik".
Kaxaber Sxadadze, "İnter"in baş məşqçisi: "Oyun baxımlı olmadı, böyük fasilədən sonra ilk oyunlar həmişə çətin olur. Bir sıra futbolçularımız milli komandalardan yeni döndüyü üçün iki gün öncə tam heyətlə toplaşa bilmişik. Azarkeşlərimizin bizdən istədiyi oyunu göstərmək üçün vaxt lazımdı. Bugünkü oyunda qalib gəlib turnir cədvəlində üçüncü pilləyə yüksəldik".
