14 fevral 2011 17:02
Qəbələ üçün İngiltərədə Tofiq Bəhramov Kuboku
“Qəbələ”nin 14 yaşa qədər futbolçularından ibarət komandası bugün İngiltərə turnesi çərçivəsində Bakı vaxtı ilə saat 22:00-da son oyununu keçirəcək. Azerisport.az xəbər verir ki, “Sheffild United” və təmsilçimiz arasında baş tutacaq matç daha bir yeniliklə əlamətdar olacaq.
Belə ki, komandalar həm Azərbaycan, həm də İngiltərə futbol tarixinə adını qızıl hərflərlə yazdırmış tanınmış hakimimiz Tofiq Bəhramovun adına təsis olunan kubok uğrunda mübarizə aparacaqlar. Belə bir təkliflə çıxış edən “Sheffild United” klubu bu addımı atmaqla həm də Azərbaycan və İngiltərə futbolu arasındakı əlaqələri genişləndirməyi hədəfləyir.
Matç öncəsi açıqlama verən klubun icraçı direktoru Trevor Birç qarşılaşmanın önəmindən danışıb: “Tofiq Bəhramov həm Azərbaycanın, həm də İngiltərənin milli qəhramanıdır. Məhz buna görə, qarşılaşmanın məhşur hakimin adı ilə bağlı olmasını təklif etdik və təklifimiz müsbət dəyərləndirildi. Bu addım həm ölkələrimiz, həm də klublarımız arasındakı futbol ənənələrinin inkişafına təkan olacaq”.
