16 fevral 2011 13:06
Anji Roberto Karlosla Şükürovu Bakıya gətirir
2002-ci ilin dünya çempionu, Braziliya yığmasının müdafiəçisi Roberto Karlos Bakıya gələcək. Azerisport.az xəbər verir ki, Mahir Şükürovun komanda yoldaşı olan, bu günlərdə Mahaçqalanın “Anji” klubuna transfer olunan Karlos bu komandayla birgə paytaxtımızda təlim-məşq toplanışında olacaq.
Məlum olduğu kimi, Mahaçqala klubu hələ çoxdan Bakıda hazırlıq prosesi planlaşdırmışdı. Bu mənada Rusiya çempionatının startı ərəfəsində baş məşqçi Hacı Hacıyev Mahir və komanda yoldaşlarını son olaraq məhz Bakıda, paytaxt eyniadlı klubuna məxsus bazada hazırlaşdıracaq. Rusiya klubu Azərbaycanda bir sınaq matçı da keçirməyi planlaşdırır. Rəqib isə çox güman ki, “Qarabağ” olacaq.
Qeyd edək ki, Vaqif Sadıqovla Emin Ağayevin də çalışdığı “Anji” Rusiya Premyer Liqasının açılış turu çərçivəsində martın 12-də “Krasndodar”la qarşılaşacaq.
