16 fevral 2011 14:37
Amit Quluzadə Almaniyadan qayıtdı və danışdı
"Neftçi"nin gənc üzvü Amit Quluzadə Almaniyada keçirdiyi uğurlu əməliyyatdan sonra vətənə dönüb. Azerisport.az xəbər verir ki, futbolçu bu münasibətlə açıqlama da verib və hazırkı durumuna aydınlıq gətirib:
"Bilirsiniz ki, xeyli müddətdir zədəm var idi. Hətta yığmamızın Birləşmiş Ərəb Əmirliklərində keçirdiyi təlim-məşq toplanışında iştirak etsəm də, zədə səbəbindən Macarıstanla görüşdə oynaya bilmədim. Məhz elə oradan əməliyyat olunmaq üçün birbaşa Almaniyaya yollandım. Uğurla əməliyyat olunduqdan sonra, həftənin əvvəlində vətənə qayıtdım. İnşallah artıq fevralın 22-dən etibarən yüngül qaçışlara başlayacam. Bərpa prosesini uğurla keçib, tezliklə komandamın sıralarına qoşulmaq istəyirəm" – deyə futbolçu klubun rəsmi saytına açıqlamasında bildirib.
