18 fevral 2011 16:54
Təyyarəçilərin Lənkəran sindromu var
Premyer Liqanın 21-ci turunun mərkəzi oyununda “Xəzər Lənkəran” evdə cari mövsümün iddialı təsir bağışlayan komandalarından olan AZAL-ı qəbul edəcək. Azerisport.az xəbər verir ki, “təyyarəçilər” ilk altılığa düşmək üçün heç də az çalışmır. Lakin çempionluq uğrunda mübarizə aparan “Xəzər Lənkəran” tarixi ərzində də bu komanda üçün heç də uğurlu rəqiblərdən olmayıb.
Turnir cədvəlində hal-hazırda 5-ci olan AZAL ilə ikinci pillədəki “Xəzər Lənkəran” 4-cü turda qarşılaşmışdı. Bakıdas baş tutan həmin qarşılaşmada cənublular 1:0 hesablı qələbə qazanıb. Bu mövsüm üç dəfə cərimə zərbəsindən fərqlənən Elvin Beqiri bu qollardan birini məhz həmin oyunda vurmaqla komandasına səfərdə üç xal qazandırmışdı.
Ümumilikdə isə AZAL-ın səfər oyunlarında bu mövsüm yalnız 3 oyunda qələbə qazandığını, 2 oyunda məğlub olduğunu və beş oyunda heç-heçə etdiyini görə bilərik. “Muğan”a səfərdə məğlub olan “təyyarəçilər”, həmçinin MOİK-lə oyunda xal itirən nadir komandalardandı. “Xəzər Lənkəran”ın ev oyunlarda nəticəsi isə belədi: 7 qələbə, 2 heç-heçə və 1 məğlubiyyət. Bu, on ev oyununun yalnız ikisində komanda qapısında qol görüb.
Top fərqinə görə komandaların göstəriciləri bir-birinə yaxındı – “Xəzər Lənkəran”da +13, AZAL-da +12. Lakin AZAL bu mövsüm rəqibinə nisbətən 3 qol çox vurub (23-26), amma buraxılan toplarda “Xəzər Lənkəran”ın göstəricisi daha yaxşıdı (10-14).
Ötən illərdə “Olimpik” adlanan AZAL-ı çempionat çərçivəsində “Xəzər Lənkəran” bugünə kimi 5 dəfə qəbul edib. Bu görüşlərin heç birində meydan sahibləri məğlub olmayıb, 3 dəfə qalib gəlib, 2 dəfə isə oyunlar heç-heçə başa çatıb. Maraqlıdı ki, bu 3 qələbə müxtəlif hesablarla, amma 1 top fərqi ilə qazanılıb – 1:0, 3:2, 2:1. Lənkəranda baş tutan son görüşdə də “Xəzər Lənkəran” üç xal qazana bilib.
