19 fevral 2011 11:52
“Qarabağ XL-ı məğlub etdisə, deməli, biz də bacararıq”
AZAL-ın qapıçısı Cahangir Həsənzadə azerisport.az saytına müsahibəsində sabah baş tutacaq “Xəzər Lənkəran”la oyun və ilk altılığa düşmək şanslarını dəyərləndirib.
- “Gəncə” ilə oyunda arzulamadağınız heç-heçəyə razılaşmalı oldunuz. Şanslarınız azalmayıb?
- Xeyr. Şanslarımız azalmayıb. Biz bura qədər belə yüksək səviyyəli çıxış etmişiksə, məncə lazımı 1 xalı toplamaqda elə də çətinlik çəkmərik. Fikrimcə, istəyimizə nail olacağıq.
- Ancaq buna “Xəzər Lənkəran” və “Bakı” ilə oyunlarda nail olmalısız...
- Mən bu komandalar haqda xüsusi danışmaq istəməzdim. Axı biz də onlarla eyni sırada yer alırıq. Gördüyünüz kimi, onlardan heç zəif deyilik. Biz paytaxt klubunu 6 xal qabaqlayırıq. Qoy onlar həlledici mərhələyə necə düşməli olacaqlarını düşünsünlər.
- Amma sizə də növbəti mərhələyə vəsiqəni təmin etmək üçün 1 xal vacibdi...
- Bu, o demək deyil ki, biz son iki oyunda ancaq 1 xal üçün mübarizə aparacağıq. Biz son vaxtlar pisləşdirdiyimiz xal ehtiyatımızı yaxşılaşdırmaq istəyirik.
- Bu baxımdan ən böyük üstünlük sizi üçün Lənkəranda qələbə qazanmaq olar...
- Hamı bilir ki, AZAL güclü komandalara qarşı yaxşı, zəif rəqiblərlə görüşdə isə zəif oyun sərgiləyir. XL yaxşı komandadı. Ötən illə müqayisədə bu komanda çox dəyişib. Bizə çox çətin olacaq. Ancaq Lənkərana ən azı uduzmamağa gedirik. Əgər “Qarabağ” XL-ı məğlub etməyi bacarıbsa, deməli, biz də bacararıq.
- Siz Lənkərandan qələbəylə dönməyi düşünürsüz?
- Niyə də yox? Yaxşı oyun sərgiləsək, nəticə özü gələcək. Biz heç də ora 1 xal dalınca getmirik.
- Bu həftə XL və AZAL arasında danışıqlara gediləcəyinə dair çoxlu söhbətlər dolaşdı. Guya indi rəqibiniz sizə vacib 1 xal verəcək, həlledici mərhələdə isə siz onların borcunu qaytaracaqsız...
- Belə iyrənc sazişə inanmıram. Biz XL-ın bizə xal bağışlamasına ehtiyac duymuruq. Heç rəqib də bizim onlara xal bağışlamağımızı arzulamaz.
- Böyük karyeraya maliksiz. Azərbaycan çempionatında belə razılaşmaların şahidi olmusuzmu?
- Mən bu haqda danışmaq istəmirəm.
- Yeri gəlmişkən, siz Lənkəranda uduzsaz, “Bakı” isə “Turan”ı yensə, sizin “zolaqlılar”la gələn turdakı görüşünüz final xarakteri daşımış olacaq...
- Prinsipcə, mən də belə düşünürəm ki, hər şeyə son turda aydınlıq gəlmiş olacaq. Ancaq istənilən halda biz hər bir şansımızdan maksimum yararlanmalıyıq.
