19 fevral 2011 12:06
“Rəqiblər arasında heç vaxt fərq qoymuruq”
Sabah - fevralın 20-də futbol üzrə Azərbaycan çempionatının birinci divizionunun mərkəzi matçında “Abşeron” paytaxtın “Rəvan” komandasıyla üz-üzə gələcək. Azerisport.az xəbər verir ki, “Rəvan”ın rəqiblərini qəbul etdiyi “Şəfa” stadionunun 4-cü meydançasında keçiriləcək qarşılaşma saat 14.00-da başlayacaq.
Məsul oyun qabağı son məşqinə çıxan “Abşeron” komandası hazırlığını Olimpiya Milli Seçmə komandalarının təlim-məşq bazasında keçirib. Klubun mətbuat xidmətindən aldığımız məlumata görə, baş məşqçi Mirbağır İsayevin rəhbərliyi altında oyuna hazırlaşan komanda üzvləri çalışdırıcının bütün tapşırıqlarını həvəslə yerinə yetiriblər.
Qarşıdakı matçla bağlı fikirlərini açıqlayan İsayev bildirib ki, o, “Rəvan”la oyunu digər komandalarla oyundan fərqləndirmir, bu matça çempionatın növbəti təqvim oyunu kimi baxır: “Biz rəqiblərimiz arasında heç vaxt fərq qoymuruq. Bütün matçlara qələbə əzmi ilə çıxdığımız kimi “Rəvan”la oyuna da 3 xal uğrunda mübarizə üçün çıxacayıq”.
