21 fevral 2011 18:01
Lyubo Baranin: İndi sadəcə növbəti mövsüm haqda düşünə bilərik
“Qəbələ”nin müdafəçisi Lyubo Baranin azerisport.az saytına müsahibəsində Premyer Liqanın son turunda “Muğan”a məğlubiyyətdən və ilk altılığa düşmək şanslarından danışıb.
- Son məğlubiyyətinizə nə səbəb oldu?
- Pis oynadıq, buna görə də uduzduq. Bizim oyun sadəcə faciədi. Bu, bizim yüksək yerlər uğrunda mübarizəmizi davam etdirmək üçün son şansımız idi. Ancaq bizi onu buraxdıq. Fikrimcə, daha şansımız qalmayıb. İndi sadəcə növbəti mövsüm haqda düşünə bilərik.
- Niyə belə tez ruhdan düşürsüz, axı hələ şanslarınız qalır?
- Mən inanmıram ki, “Bakı” təsnifat mərhələsinin son turunda AZAL-a uduzsun. Yəqin ki, biz “Gəncə”ni udarıq. Əgər hətta “Bakı” heç-heçə etsə belə, yenə xallar bərabər olacaq və paytaxt klubu bizdən yuxarıda yer alacaq.
- “Qəbələ” belə bir məqamda niyə bu şəkildə zəif oyun sərgilədi ki?
- Düzünü desəm, problemimizin əsl səbəbi mənə də aydın deyil. Hələ “Qarabağ”la oyunda göründü ki, biz pis oynayırıq.
- Komandada yeni forvard peyda olub, amma “Qəbələ” əksinə qol vura bilmir...
- Bu haqda suala baş məşqçi aydınlıq gətirməlidi. Bu, onun işidi.
- Ola bilərmi ki, “Muğan” rəqibləriniz tərəfindən yaxşı stimullaşdırılıb?
- Əgər hətta bu baş versə belə, normal haldı. Bütün dünyada bundan yararlananlar var. Bu, bizim günahımızı azaltmır. Günahkar biz özümüzük
- Komanda yoldaşlarınızdan hakimi günahlandıranlar da var. “Qəbələ” hakimlikdən narazıdı?
- Mən düşünmürəm ki, hakim oyunun nəticəsinə ciddi təsir etdi. Ancaq bütövlükdə hakimlər bizim oyunlarda heç də həmişə loyal münasibət göstərməyiblər. Əgər bizim oyunlarımızı da paytaxt klublarının görüşləri kimi idarə etsəydilər, biz iki ay öncə hər şeyi həll etmişdik.
