21 fevral 2011 19:44
Juninyo: AZAL-a da qalib gələcəyik
“Bakı”nın braziliyalı yarımmüdafiəçisi Junior Osvaldo Martins (Juninyo) komandasının Premyer Liqanın ilk altılığına düşmək şansları barədə danışıb. Azerisport.az o, müsahibəsində zədəsi və “Turan”la son oyun haqda da fikirlərini açıqlayıb.
- Ötən həftə “Turan”a qarşı oyunda zədələndin. Səni yenidən nə vaxt meydanda görəcəyik?
- Son zamanlar zədələr məni rahat buraxmır. Növbəti tur AZAL-a qarşı oynamaq istəsəm də, təəssüf ki , bunu edə bilməyəcəm. Çox üzgünəm. İki həftəyə məşqlərə başlayacam. İnanıram ki, komanda ilk altılığa vəsiqə qazanacaq və mən çıxışımı bu mərhələdə davam etdirəcəyəm.
- “Turan”la oyun haqda təəssüratların necədi?
- Bu oyunda qələbə çox lazim idi. Bilirsiniz ki, bu oyunda qalib gəlməsəydik, ilk altılığa düşmək şanslarımızı itirə bilərdik . “Turan”la oyun çox çətin keçdi. Meydançanın pis vəziyyətdə olması oyunumuza mənfi təsir etsə də, istəyimizə çatdıq. Bu oyunda mən də özümü yaxşı tərəfdən göstərmək istərdim. Amma, təəssüf ki, zədə buna mane oldu.
- “Bakı”nı bu həftə AZAL-a qarşı oyun gözləyir. Bu oyun barədə nə düşünürsən?
- “Bakı”nın altılıqda oynamaq şansı böyükdü. Bunun üçün AZAL-la oyunda meydanda döyüşərək qələbə qazanmalıyıq. Altılığa vəsiqə qazanmaq öz əlimizdədi, bu şansı qaçırmarıq. AZAL-a da qalib gələcəyik.
