22 fevral 2011 16:08
Georgi Adamiya: Azərbaycanın futbol tarixinə düşmək istəyirəm
Onu Azərbaycanın ən sabit legionerlərindən saymaq olar. Sabitdirsə, deməli 7 ildi Azərbaycan futbolunda top qovan Georgi Adamiya futbolsevərlərin xatirəsində xoş məqamlarla yadda qalıb.
Azerisport.az xəbər verir ki, ötən qışdan “Qarabağ”ın sıralaranda olan 29 yaşlı gürcü forvard cari mövsümdə vurduğu 8 qolla Azərbaycan çempionatında vurduğu qolların sayını 43-ə yüksəldib. Bununlada Georgi Azərbaycanda top qovmuş legionerlər arasında məhsuldarlığa görə Badri Kvaratsxeliyadan sonra 2-ci sıraya yüksəldi.
Qış fasiləsindən sonra hər 2 oyunda fərqlənən Adamiya “Gəncə” ilə oyunda vurduğu əla qolla formada olduğunu göstərdi. Bununla da qış fasiləsinə kimi durğun görsənən Adamiya yenidən işə düşdü. O, bu uğuruna münasibətini də açıqlayıb. Ağdam klubunun rəsmi saytına açıqlamasında o, bunları dilə gətirib:
“Son 2 oyunda qol vurmağım təbii ki, sevindiricidi. “Gəncə”ylə oyunda 3 xal qazanmağımız tək qolla olduğundan daha yadda qalan oldu (gülür). Əsas odu ki, komandamız qələbə qazandı. İlk dövrənin sonlarında zəif çıxış etməyimə gəlincə, deyərdim ki, bir qədər yorğunluq vardı. Baş məşqçimiz də bunu vurğulamışdı. Avrokuboklardan başlayaraq istirahət etməmişdik. Amma qış fasiləsində uzun müddətdən sonra yaxşı dincəlmək şansı oldu. Antalyada keçdiyimiz təlim-məşq toplanışında da yaxşı hazırlıq keçdik.
Son 2 oyuna çox konsentrasiya olmuşdum. Futbol belə bir şeydi. “Gəncə” ilə oyunda 2 imkanım oldu. Birinci daha real olsa da, ikincidən yararlandım. Badridən sonra 2-ci olmağımı sizdən eşidirəm. Konkret qol sayını bilməsəm də, 40-dan çox qox vurduğumu bilirdim (gülür). Badriyə çatmaq üçün nə qədər qol vurmalıyam? 28? Bir az çox oldu? (gülür). Görək də nə olur? Təbii ki, Azərbaycanın futbol tarixinə düşmək istəyərəm. Çalışacam ki, qollarımın sayı artsın. Çətin olsa da, mümkünsüz deyil. İnşallah, “`Qarabağ” hər oyunda qələbə qazandıqca mənim də qollarımın sayı artacaq”.
