22 fevral 2011 16:39
“Biz həmişə ambisiyalı komandalara qarşı xüsusi hazırlaşırıq”
“Muğan”ın hücumçusu Elşən Məmmədov azerisport.az saytına müsahibəsində Premyer Liqanın 21-ci turunun “Qəbələ” ilə oyununda qazandıqları qələbə və digər maraqlı məqamlarla bağlı fikirlərini bölüşüb.
- Salyan klubu növbəti sensasiyasını reallaşdırdı...
- Rəqibimiz güclü komanda idi. Buna baxmayaraq, qələbə qazana bildik. Uşaqlar çox inamlı oyun sərgilədilər və layiqli qələbə qazandıq.
- Ötən tur siz daha bir ilk altılığa düşmək istəyən klubdan 2 xal almışdınız...
- Yəqin, son üç həlledici turun startına kimi, çoxları belə düşünürdü ki, “Muğan” zəif komandadı. Elə bilirdilər ki, əsas yerlər uğrunda mübarizə aparmaq şansımızı itirdiyimiz üçün, zəifik və daha təslim olacağıq. Ancaq biz son iki turda bunun tam əksini göstərə bildik.
- Belə oyunu daim sərgiləyə bilsəydiz, ilk altılığa düşə bilərdiz?
- Əgər sabit oyun sərgiləsəydik, ola bilərdi ki, düşək. Belə meydançalarda yaxşı futbol sərgiləməmək ayıbdı.
- “Muğan”ın belə güclü oyun sərgiləməsində stimuallaşmanın rolu yox idi ki?
- Düzünü deyirəm ki, belə bir şey eşitməmişəm. Heç bir Premyer Liqa klubundan bizə belə bir təklif olunmayıb. Biz sadəcə çıxıb, öz oyunumuzu sərgiləyirik.
- Sizdən belə oyunu heç də həmişə görmək olmur...
- Biz həmişə ambisiyalı komandalara qarşı xüsusi hazırlaşırıq.
- Komandanız böyük məqsədlər uğrunda mübarizə aparmasa da belə, bu oyunlardakı xallara görə, rəhbərlik sizi mükafatlandıracaqmı?
- Hər şeyə rəğmən, bizə mükafatlar ayrılır. Biz mükafat alacağıq, amma öz klubumuzdan.
