23 fevral 2011 01:15
Todorov: Bu kluba qarşı oynamaq həmişə çətin olub
“Bakı”nın yeni transferi Radomir Todorov “zolaqlılar”ın heyətindəki ilk rəsmi oyunu və AZAL-la qarşıdakı prinsipial görüş barədə fikirlərini bildirib. Azerisport.az onunla müsahibəni diqqətinizə çatdırır.
- Komandaya öyrəşə bilirsənmi? Uyğunlaşma dövrü necə gedir?
- Mənim üçün adaptasiya dövrü hələ də davam edir. Komandamızın bəzi futbolçuları ilə əvvəllər birlikdə oynasam, bəziləri ilə tanış olsam da, komandaya yeni gəldiyim üçün hələ tam öyrəşməmişəm. İnanıram ki, bu mərhələni müvəffəqiyyətlə keçəcəyəm və hər şey yaxşı olacaq.
- “Turan”la oyun sənin “Bakı”nın heyətində ilk rəsmi oyunun idi...
- Bizim üçün “Turan”la oyunda əsas nəticə idi. Meydanın pis vəziyyətdə olması gözəl oyun göstərməyə imkan vermirdi. Buna baxmayaraq bizim çox qol şansımız oldu . Yaxşı ki, qol vurduq və qələbə bizim oldu.
- AZAL-la oyun barədə nə fikirləşirsən?
- “Turan” la oyunda olduğu kimi AZAL-la qarşılaşma da bizim üçün çox vacibdi. Bu oyunda da meydana yalnız qələbə üçün çıxacağıq. Əsas məqsəd xal toplayıb, ilk altılığa düşməkdi. “Altılıq”da hər şey fərqli olacaq. Bunun üçün yaxşı şansımız var. “Muğan”nın “Qəbələ”ni məğlub etməsi bizə böyük şans verdi. Hər şey özümüzdən asılıdı. Son oyunda da yaxşı oynayıb, qələbə qazanmalıyıq.
- Əvvəllər “Xəzər Lənkəran” klubunun heyətində “Bakı”ya qarşı oynamısan. Səncə, “Bakı” ilə oynamaq çətindi, yoxsa “Bakı”ya qarşı oynamaq?
- “Bakı” iddialı klubdu. Bu komandaya qarşı oynamaq həmişə çətin olub.
