23 fevral 2011 20:09
Sadıq Sadıqov: O, təkcə Neftçi`nin yox, həm də ölkə futbolunun şanlı tarixidi
Bu gün 65 yaşı qeyd edilən əfsanəvi futbolçu Anatoli Banişevski “Neftçi”nin prezidenti Sadıq Sadıqov tərəfindən də anılıb. Azerisport.az xəbər verir ki, paytaxt klubunun rəhbəri bu komandanın sabiq “9 nömrə”si haqda bunları dilə gətirib:
“Bu görkəmli futbolçunun adı “Neftçi” komandasının şanlı tarixinə qızıl hərflərlə yazılıb. Banişevski kimi oyunçular daim yaddaşlarda qalacaq. Anatoli Banişevski karyerası boyu yalnız “Neftçi”nin formasını daşıyıb. O, daim “ağ-qara” rənglərə sadiq qalıb. Məhz bu məqam onun doğma “Neftçi”ni nə qədər sevdiyini göstərir. Təsəvvür edirsiz, ona möhtəşəm karyerası boyu bir çox tanınmış klublardan təkliflər gəlib. Ancaq Banişevski doğma komandasını tərk etməyib. Biz daim onu anırıq. Anatoli Banişevski təkcə “Neftçi”nin yox, həm də Azərbaycan futbolunun şanlı tarixidi. Veteran futbolçularımız daim bizim diqqət və qayğımızla əhatə olunublar. Bundan sonra da biz onlara əlimizdən gələn köməyi edəcəyik”.
