24 fevral 2011 00:56
Azərbaycanı AÇ-2012-yə aparan yol
Bu gündən etibarən fevralın 27-dək Bakıda futzal üzrə Avropa çempionatının əsas seçmə mərhələsinin 1-ci qrupunun oyunları keçiriləcək. Azerisport.az xəbər verir ki, qrupunun oyunlarına ev sahibliyi edən komandamız Xorvatiyada düzənlənəcək qitə çempionatında iştirak etmək üçün Qazaxıstan, Fransa və İspaniya səddini uğurla keçməyə çalışacaq.
Qeyd edək ki, bütövlükdə seçmə mərhələdə 24 komanda iştirak edir ki, onlar da xeyli müddət öncədən 6 qrupa bölünüb. 4 komandadan ibarət qrupların qalibi olacaq komandalar, eləcə də 5 ən yaxşı qrup ikincisi Xorvatiyadakı final mərhələsinə vəsiqə qazanmış olacaq. Xorvatların isə ev sahibi kimi qatılacağı 12 komandadan ibarət həlledici mərhələnin püşkatma mərasimi sentyabrın 9-da Zaqrebdə baş tutacaq.
Azərbaycan yığmasının ardıcıl ikinci dəfə qitə çempionatının final mərhələsində iştirak etməsi üçün gözəl şansı var. Lakin bunun üçün hazırkı Avropa çempionu olan İspaniya millisi ilə oyunda lazımı nəticə qazanmaq əsas şərtdi. Ancaq bu da faktdı ki, ispanlar artıq 4-cü dəfə bu turniri qazanmaq üçün heç də az potensiala malik deyil.
Hər halda komandamızı çox çətin görüşlər gözləyir. İspanlar üzərində mümkün qələbə sensasiya hesab olunacaq. Amma biz bu sensasiyanı gerçəkləşdirməyə də borcluyuq. Lakin ispanlara kimi komandamızın digər rəqibləri ilə görüşlərdən itkisiz ayrılması da vacibdi. Hər halda bu gün qazaxlarla münasibətlərinə aydınlıq gətirəcək Joze Alesionun komandası sabah da Fransa üzərində qələbə qazanmasa, İspaniya ilə oyunun hansısa əhəmiyyəti qalmaya da bilər.
Qeyd edək ki, AÇ-nin əsas seçmə mərhələsinin 1-ci qrupu çərçivəsində Bakıda keçiriləcək oyunları idarə edəcək hakimlər də məlumdu. Qrup oyunlarını idarə edən hakimləri, hakim-inspektor və UEFA nümayəndəsi aşağıdakılardı: Hakimlər - Borut Siviç (Sloveniya), Sergey Drebujan (Ukrayna), Sergey Velikiy (Rusiya), Yan Kresta (Çexiya); Hakim-inspektor - Andrea Lastruççi (İtaliya); UEFA nümayəndəsi - Zoran Dimiç (Serbiya).
Sonda Bakıda keçiriləcək oyunların təqvimini də təqdim edirik:
24 fevral
Saat 18:30. İspaniya – Fransa
Saat 21:00. Azərbaycan – Qazaxıstan
25 fevral
Saat 18:30. Qazaxıstan – İspaniya
Saat 21:00. Azərbaycan – Fransa
27 fevral
Saat 18:30. Fransa – Qazaxıstan
Saat 21:00. İspaniya – Azərbaycan
