24 fevral 2011 15:41
Qarabağ beş ildi çempionatda uduzmadığı rəqibə qarşı
Məlum olduğu kimi, Premyer Liqanın təsnifat mərhələsinin sonuncu – 22-ci turunda “Qarabağ” “Turan”la qarşılaşacaq. Azerisport.az xəbər verir ki, bütün çempionatların iştirakçısı olan 3 klubdan ikisinin (digəri də “Neftçi”di – red.) mübarizəsi daim gərgin və maraqlı alınıb.
“Qarabağ”ımız Tovuz klubuyla cari mövsüm artıq 3-cü dəfə qarşılaşacaq. Maraq üçün xatırladaq ki, çempionatın ilk dövrəsində Tovuzda baş tutan görüşdə ağdamlılar Emin İmaməliyevin vurduğu qolla 1:0 hesablı qələbəyə sevinmişdilər. Lakin Azərbaycan kubokunun 1/8 final mərhələsində də bu klublar üz-üzə gəldilər ki, həmin görüşün əsas və əlavə vaxtı qolsuz başa çatmış, penalti seriyasında isə tovuzlular üstün olmuşdular.
Lakin bütövlükdə ölkə çempionatı səviyyəsində “Qarabağ” düz 5 ildi “Turan”a məğlub olmur. Sonuncu dəfə 2006-ci ildə Böyükağa Ağayevin “Qarabağ”a başçılıq etdiyi dönəmdə Tovuzda meydan sahibləri 3:1 hesablı qələbəyə sevinib. Həmin tarixdən sonra çempionatda baş tutan 8 görüşdə hazırda Qurban Qurbanovun çalışdırdığı komanda cəmi 1 dəfə heç-heçə edib, qalan görüşlərdə qələbə qazanıb.
