24 fevral 2011 18:14
Premyer Liqanın 19-cu mövsümü Böyük oyunla yekunlaşacaq
Azərbaycan Premyer Liqasının cari mövsümü “Böyük oyun”la yekunlaşacaq. Azerisport.az xəbər verir ki, buna artıq “Neftçi” və “Xəzər Lənkəran”ın hər ikisinin təsnifat mərhələsini birinci pillədə başa vurması şərait yaradıb.
Məlum olduğu kimi, cari mövsümün püşkü atılarkən, “altılıq” mərhələsinin də təqvimi məlum idi. Lakin onda cütlüklər 12 komandanın tutacağı pillələrə uyğun müəyyənləşdirilmişdi. Artıq təsnifat mərhələsinin sonuna bir tur qalmış digər rəqiblərinin XL və “Neftçi”yə çatmaq imkanı yoxdu. Bu isə o deməkdi ki, mayın 18-19-da baş tutacaq 19-cu milli çempionatın son turu əzəli rəqiblərin görüşüylə bitəcək. Çünki həmin turda təqvimə uyğun olaraq təsnifat mərhələsini 1 və 2-ci pillədə bitirən komandalar qarşılaşacaq. Lakin hələlik təsninfat mərhələsinin “Neftçi”nin və ya XL-ın liderliyi ilə bitməsi dəqiqləşmədiyindən, həmin görüşün Lənkəranda, yaxud Bakıda keçiriləcəyi də dəqiq bilinmir. Sadəcə onu qeyd edək ki, təsnifat mərhələsinin çempionu həmin görüşdə ev sahibi qismində çıxış edəcək.
Qeyd edək ki, "Neftçi" və "Xəzər Lənkəran" arasındakı final mərhələsinin ilk oyunu isə 24-cü tura təsadüf edəcək. Bu turun oyunları da martın 18-19-da keçiriləcək. Bu, əzəli rəqiblərin mart ayındakı 3-cü "Böyük oyun"u olacaq. Belə ki, "Neftçi" və "Xəzər Lənkəran" martın 3-ü və 8-də Azərbaycan Kubokunun 1/4 final mərhələsində də üz-üzə gələcəklər. Bir sözlə mart ayında da 3 XL - "Neftçi" duelinin şahidi olacağıq.
