24 fevral 2011 11:43
Kamran Ağayev: Biz ancaq Böyük oyuna xüsusi hazırlaşırıq
“Xəzər Lənkəran”ın qapıçısı Kamran Ağayev azerisport.az saytına müsahibəsində Premyer Liqanın 22-ci turunun “İnter”lə keçiriləcək oyunundan danışıb.
- Son çempionla oyuna hazırlıqlarınız necə gedir?
- Çempionla qarşılaşacağıq. Artıq onlarla oynamağa hazırıq. Əgər biz qarşımıza çempion olmaq məqsədi qoymuşuqsa, deməli hər bir rəqibimizə qalib gəlməliyik.
- “Bankirlər”lə oyunlar sizin üçün xüsusi əhəmiyyət kəsb edir?
- Çempionatın bütün oyunları əhəmiyyətlidi. “İnter”lə oyuna da əksər oyunlara olduğu kimi hazırlaşırıq. Xüsusi olaraq ancaq derbiyə (Böyük oyunu nəzərdə tutur – red.) hazırlaşırıq.
- “Xəzər Lənkəran” “İnter” üzərində “Şəfa”da qazandığı qələbəni xatırlayırsız?
- Mən ancaq “İnter”ə necə qalib gəlmək haqda düşünürəm. Əgər buna inanmasaydım, meydana çıxmazdım. Çoxları elə hesab edər ki, mən çox özümdən razıyam. Amma bu elə deyil. Sadəcə mən çox ambisiyalı insanam. Qələbə üçün döyüşməli olacağıq.
- Lənkərandakı oyununuz məşqçilər arasındakı qalmaqalla başa çatmışdı, Kaxaber Sxadadze Mirça Redniki təhqir etmişdi. Bu, cavab oyununun gərgin keçəcəyini deməyə əsas verə bilər?
- Matç vaxtı hər şey ola bilər. Ancaq biz belə şeylərə o qədər də inanmırıq. Əlbəttə, bu aydın məsələdi ki, biz heç də düşmən kimi oynamayağıq. Əlavə hansısa reaksiya da olmayacaq. Xoşagəlməz məqamlar cavab görüşündə təkrarlanmamalıdı.
- “Neftçi” ilə oyun öncəsi demişdiz ki, rəqibinizə uduzmayacaqsız. Bu dəfə nə deyirsiz?
- Bunu ancaq Allah bilir. Hər şey onun əlindədi. Biz sadəcə qələbə qazanmağa çalışacağıq.
- “Neftçi”nin MOİK-lə oyunda xal itkisi nə dərəcədə inandırıcıdı?
- Başqa komandalardan danışmaq istəmirəm. Ona görə ki, bütün fikirlərim öz klubuma yönəlib. Əgər biz hər oyunda qələbə qazansaq, onda çempionluğa əsas namizəd də olacağıq.
