25 fevral 2011 17:27
Qurban Qurbanov da Qarabağı təriflədi, Şensoy da
Premyer Liqanın təsnifat mərhələsinin sonuncu – 22-ci turunda üz-üzə gələn “Qarabağ”la “Turan”ın görüşündən sonra baş məşqçilər oyunla bağlı fikirlərini açıqlayıblar. Azerisport.az xəbər verir ki, Ağdam klubunun çalışdırıcısı Qurban Qurbanov bunları dilə gətirib:
“Bu oyuna ciddi hazırlaşmışdıq. Turnir cədvəlində mümkün qədər üst pillələrdə qərarlaşmaq üçün qələbə qazanmağı arzulayırdıq. Erkən qol vurmağımız işimizi asanlaşdırdı. İkinci hissədə “Turan” daha yaxşı oynadı. Komandamın oyunundan razı qaldım. Həm bu görüşdə, həm də bütövlükdə çempionatın ilk mərhələsində yaxşı oynadıq. Komandamız sübut etdi ki, inkişaf var. İndi bizi daha vacib olan 10 qarşılaşma gözləyir. İnanıram ki, Naci Şensoy əvvəlki "Turan"ı qaytara biləcək, gələcəkdə daha da yaxşı oynayacaqlar”.
Tovuz klubunun türkyəli çalışdırıcısı Naci Şensoy isə bunları bildirib: “Qarabağ” Azərbaycan futbolu oynamır. Qurban Qurbanov çox yaxşı komanda yaradıb. Düzünü deyim ki, bu qədər erkən qol buraxacağımızı gözləmirdim. Demək olar ki, oyun artıq 10-cu dəqiqədə bitmişdi. Fasilədə bəzi futbolçularla danışdıq, səhvlərini başa saldıq. İkinci hissədə isə oyunumuz bərabər getdi”.
