25 fevral 2011 19:04
Starkov sevinir, Süleymanov gileylənir
Premyer Liqanın bu gün çox vacib əhəmiyyətə malik AZAL - “Bakı” görüşündən sonra hər iki komandanın çalışdırıcısı matçla bağlı fikirlərini açıqlayıblar. Azerisport.az xəbər verir ki, 0:0 hesabıyla başa çatan və “Bakı”nın ilk altılıqda çıxış edəcəyini rəsmiləşdirən qarşılaşmadan sonra “Bakı”nın baş məşqçisi Aleksandr Starkov bunları dilə gətirib:
“Əsas məqsədimiz ilk altılığa düşmək idi. Qələbə qazana bilməsək də, heç-heçə edib buna nail olduq. Futbolçularda psixoloji gərginlik hiss olunurdu. Bir neçə qol vəziyyəti yaratdıq, lakin bunlardan lazımınca istifadə edə bilmədik. Oyunda üstün tərəf biz idik”.
AZAL-ın baş məşqçisi Nazim Süleymanov isə komandasının növbəti xal itkisini belə dəyərləndirib: “Çox gərgin oyunun şahidi olduq. Futbolçular meydanda sonadək mübarizə apardılar. İlk altılıqda yerimizi təmin etməyimizə baxmayaraq, bu oyunda qələbə qazanmaq istəyirdik. Hücum xəttində çatışmamazlıqlarımız var, bunu tezliklə aradan qaldırmağa çalışacağıq”.
