26 fevral 2011 15:32
Ramim: Bundan sonrakı bütün oyunlarımız 6 xallıq xarakter daşıyacaq
“Bakı”nın və Azərbaycan yığmasının yarımmüdafiəçisi Fabio Luis Ramim azerisport.az saytına müsahibəsində “altılığ”a vəsiqə qazanmalarından və şanslarından danışıb.
- “Bakı” hər şeyə rəğmən ilk altılığa düşə bildi. Belə nəticəni gözləyirdiz?
- Hamı başa düşürdü ki, bizim növbəti mərhələyə vəsiqə qazanmağımız üçün cəmi 1 xal kifayətdi. Çətin oyun oldu. Fikrimcə, komandamız daha yaxşı oynadı. Yaxşı ki, istəyimizə nail olduq.
- Siz bu oyunda ancaq heç-heçə etməyə köklənmişdiz?
- Yox, biz qələbə qazanmaq istəyirdik. Əgər 3 xal qazanmaq imkanı varsa, niyə başqa şey haqda düşünməliydik? Axı biz təkcə ilk altılığa vəsiqə qazanmağı yox, həm də qarşıdakı mübarizəni düşünürdük.
- Amma sizin oyununuz tam fərqli şey deyirdi...
- Bizim oyunda sadəcə sürət çatışmırdı. Bəzi amillər var idi ki, bunlar da AZAL-ı məğlub etməyimizə mane oldu. Aleksandr Starkov yeni gəlib və ona vaxt lazımdı ki, komandada hər şeyi qaydasına salsın. Hər şey dərhal düzəlmir.
- Yeri gəlmişkən, oyun çox sərt keçdi. Hər iki komandada tez-tez həkim yardımına ehtiyac duyan futbolçular var idi...
- Hava soyuq idi. Bəzi toqquşmalar qəsdən olsa da, çoxu oyun epizodunda yaranırdı. Digər tərəfdən hər iki komandaya xal lazım idi. AZAL artıq çoxdandı qələbə qazanmırdı. Buna görə də oyunçular meydanda döyüşürdü.
- Bundan sonra nə düşünürsüz?
- İlk növbədə unutmamalıyıq ki, ilk altılığa vəsiqə qazanmışıq. İndi sakitcə Premyer Liqanın həlledici oyunlarına və ölkə kubokuna hazırlaşa bilərik.
- Yeri gəlmişkən, “Bakı” liderlər qrupundan çox geri qalır...
- Təbii ki, çempionatın ilk dövrəsində çoxlu xal itirmişik. Ancaq fərq ola bilər ki, tez bir zamanda ərisin. Axı bütün oyunlar 6 xallıq xarakter daşıyacaq. Bizim 3 qələbəmizlə rəqiblərimizin 3 ardıcıl yenilgisi hər şeyi dəyişə bilər.
