26 fevral 2011 16:47
Türkiyəli futbolçular Hiddinki boğaza yığıb
AÇ-2012-nin seçmə mərhələsində millimizin rəqiblərindən olan Türkiyə yığmasının baş məşqçisi Qus Hiddink komandasının hazırkı durumundan şikayətlənib. Azerisport.az xəbər verir ki, Türkiyə futbolunda yeni istedadların yetərli olmadığına, futbolçu düşüncəsinin aşağı olmasına diqqət çəkən hollandiyalı mütəxəssis bir sıra maraqlı fikirlər səsləndirib.
Xüsusilə türkiyəli futbolçuların hakimlərlə mübahisələrə girişməsindən bərk narazı olan Hiddink bunları dilə gətirib: “Türkiyə futbolunun gələcəyi sağlam təməllərə söykənməlidi. Bunu bacarmaq üçün də mənim bəzi qaydalarım, şərtlərim var. Çox yaxşı bir futbolçu ola bilərsiz. Amma əgər hirs, hiss və duyğularınıza hakim ola bilmirsizsə, bu, bir işə yaramaz. Hər dəfə hakimə etiraz etmək olmaz. Hakim, verdiyi qərrarlarda haqlı və ya haqsız ola bilər, biz futbolumuzu oynamalıyıq. Hər dəfə hakimin üstünə qaçıb etiraz etməyin heç bir məntiqi yoxdu. Cənubi Koreya matçında bunu yaşadıq. Əgər komandamızda bu tip futbolçulardan 5-6-sı varsa, deməli işimiz çətindi. “Twente”, “Ajax” və PSV-nin Avropa arenasında əldə etdikləri uğurlar buna ən böyük örnəkdi. Hər üç klub “Anderlecht”, “Lille” və “Rubin” kimi önəmli rəqiblərini mübarizədən kənarlaşdırmaqla, Avropa sıralamasında Hollandiyanı Türkiyənin önünə keçirdi”.
Sonda onu da qeyd edək ki, Hiddink artıq son vaxtlar tez-tez bu mövzuya toxunur və belə görünür ki, türkiyəli oyunçuların intizamsızlığı onu həqiqətən boğaza yığıb.
