26 fevral 2011 11:48
Aqil Nəbiyev: İlk altılığa 5-6-cı yerləri tutmaq üçün çıxmamışıq
AZAL-ın kapitanı Aqil Nəbiyev Premyer Liqanın 22-ci turunun “Bakı” ilə oyunundan sonra azerisport.az saytının suallarını cavablayıb.
- Çoxları belə proqnozlaşdırırdı ki, AZAL “Bakı” ilə heç-heçə oynayacaq...
- Oyundan öncə bu haqda çox danışılırdı. Ancaq biz “Bakı” ilə belə danışıqlarara getməmişdik. Turdan öncə biz ilk altılıqdakı yerimizi təmin etdiyimizdən bu dəfə sadəcə əlavə xal toplamaq istəyirdik. Axı avrokuboklara düşmək üçün bizim hər belə oyundan qələbəylə ayrılmağımız lazımdı. Ancaq hər iki komandalar ehtiyatlı oynadı. Məncə, AZAL qələbəyə yaxın idi.
- Hesab etmirsiz ki, ehtiyatlı oyun da məhz bu danışıqlar haqda deyilənləri təsdiqləyir?
- Mən həmişə belə şeylərə qarşı olmuşam. Ona görə bu haqda danışmağı da xoşlamıram. AZAL belə şeylərə heç vaxt getmir. Yeri gəlmişkən, mümkündü ki, mən mövsümün sonunda komandadan gedim.
- Bu nə ilə bağlıdı ki? Daha sərfəli təklif var?
- Mən bu haqda ciddi düşünürəm. Təklifə gəlincə, o, çoxdan var. Bu, yerli klubdu. Türkiyənin birinci liqasından da dəvət var idi. Ancaq ora gedişim alınmadı.
- Sizin hazırkı komandanız artıq 7 turdu qələbə qazana bilmir. Bu, nə ilə bağlıdı?
- Mən bunu dramatikləşdirməyin əleyhinəyəm. Biz sadəcə 2 oyunda uduzmuşuq. Qalanlarında bildiyiniz kimi, sadəcə heç-heçə etmişik. Müdafiədə bizdə hər şey qaydasındadı. Problemimiz sadəcə hücum xəttindədi. Bunun üzərində də işləyirik.
- Hələlik sizdə bu, heç də yaxş alınmır...
- Biz ilk altılığa 5-6-cı yerləri tutmaq üçün çıxmamışıq. Bizim əsas vəzifəmiz avrokuboklardan birində çıxış etməkdi.
- Son oyunun gedişində Vaqif Cavadovla mübarizə zamanı onun burnunun qanaması Fizulu Cavadovun sizlə mübahisəsinə səbəb oldu...
- Mən Vaqifə qarşı qəsdən heç nə etmədim. Bu, sadəcə oyun epizodu idi. Fizuli Cavadov mənim atam yaşdadı. Mən onu tanıdım. Əgər bu hansısa başqa bir azarkeş olsaydı, mən buna reaksiya verməzdim. Vaqif elə vəziyyət yarandığına üzr də istədi.
