26 fevral 2011 00:04
Yığmamızın baş məşqçisi razı qaldı, Pyer Jak təriflədi
Futzal üzrə Azərbaycan yığmasının baş məşqçisi Joze Alesio da Silva Avropa çempionatının seçmə mərhələsi çərçivəsində Fransa ilə oyunu şərh edib. Azerisport.az xəbər verir ki, braziliyalı mütəxəssis komandamızın 4:2 hesabıyla qələbə qazandığı görüşlə bağlı bunları dilə gətirib:
“Dünənki oyunla müqayisədə bu gün komandamdan razıyam. Bu oyuna çox yaxşı hazırlaşmışdıq. Rəqibi də yaxşı analiz etmişdik. İspaniya haqda isə sabah düşünməli olacağıq. Mən Azərbaycana gələncə yaxşı yerli oyunçular görməmişdim. Biz o məsələ üzərində işləyirik ki, yeni azərbaycanlı futzalçılarımız olsun”.
Fransa millisinin çalışdırıcısı Pyer Jak isə bunları söyləyib: “Biz onsuz da Azərbaycan üzərində qələbə qazanacağımızı gözləmirdik. Ancaq istənilən halda qapımızdan buraxılan erkən qol sözünü dedi. Belə komandayla oynamaq bizim gənc futzalçılarımız üçün böyük təcrübədi. Mənim üçün İspaniya və Azərbaycan yığmaları arasında müqayisə aparmaq çətindi. Azərbaycanlı oyunçular fərdi oyunlarda çox yaxşıdılar, fiziki və texniki cəhətdən güclüdülər. Amma ispanlarda əla kollektiv oyunu var. Onlara bazar günü çətin olacaq”.
