1 mart 2011 17:53
Mirbağır İsayev: İnter`ə xüsusi sürprizimiz yoxdu
“Abşeron”un baş məşqçisi Mirbağır İsayev azerisport.az saytına müsahibəsində Azərbaycan kubokunun 1/4 final mərhələsinin “İnter”lə oyunlarındakı şanslarından danışıb.
- “Abşeron”un işləri heç də pis getmir...
- Cəmi iki oyunda heç-heçə etmişik. Ancaq qalan bütün oyunlarımızda qələbə qazanırıq. Uşaqlar sağ olsunlar. Cəmi bir qol buraxmağımız da sevindirici məqamlardandı. Bu, çox yaxşı göstəricidi.
- Bəs ölkə kubokunda məqsədiniz nədi?
- Məşq edirik. MOİK və “Simurq”la kubok oyunlarına necə hazırlaşmışdıqsa, buna da eyni şəkildə hazırlaşırıq. Baxaq, görək necə alınacaq. Bəzi kadr itkilərimiz var. Biz həm də çempionat oyunlarına hazırlaşırıq.
- Kubok oyunlarını ciddi hesaba almırsız?
- Həmişə demişəm ki, birinci divizionun oyunları bizim üçün daha yüksəkdə durur. Bu turnirin səviyyəsinə baxmayaraq, birinci divizion hazırda bizim üçün qazanılası əsas birincilikdi. Lakin bu, o demək deyil ki, biz kubokdan əlimizi çəkmişik. Biz “İnter”lə də oyuna hazırıq. Güclü komandadı. Axı onlar hətta “Birlik Kuboku”nu qazandılar.
- Sizcə, birinci divizionu təmsil edən komandanız Premyer Liqanın son mövsümünün çempionunu məğlub edəcək gücdədi?
- Bu cür bənzətmələri jurnalistlər edə bilər. Biz isə öz oyunumuzu sərgiləməyə çalışacağıq. Oyundan sonra deyə bilərəm ki, bizim şanslarımız necədi.
- Öz ev oyunlarınızı elə “İnter”in sayılan “Şəfa” stadionunda keçirirsiz. Daha münasib stadion tapa bilməzdiz ki, komandanıza faydası olsun?
- Niyə bərabərsəviyyəli meydandan imtina etməliyik ki? İndi ölkədə yaxşı qazon baxımından problemlər var. Niyə pis vəziyyətdə olan arenalarda oynamalıyıq ki? Mövsüm hələ başa çatmayıb və heç kimin zədələnməsini də istəmirik. Futbol oynamalıyıq, ot haqda düşünməməliyik.
- Bu komandaya qarşı necə oynamağı planlaşdırırsız?
- Meydanda görəcəksiz. Bizim “İnter” üçün xüsusi sürprizimiz yoxdu.
