2 mart 2011 15:09
“Mən qol vurduğum oyunlarda Qarabağ uduzmur”
“Qarabağ”ın Premyer Liqanın təsnifat mərhələsinin sonuncu turunda “Turan”ı darmadağın etməsində daha bir yadda qalan məqam 5-ci qola imza atan Admir Teli oldu. Azerisport.az xəbər verir ki, albaniyalı müdafiəçi komandasında qol vuran 2-ci müdafiəçi oldu.
Elə bu münasibətlə də o, həm vurduğu qol, həm də cari mövsümdəki hədəfləri barəsində fikirlərini açıqlayıb: “Adətən, bütün standard vəziyyətlərdə qol vurmaq üçün irəli gedirəm. Amma alınmırdı. “Turan”la oyunda qələbəni artıq rəsmiləşdirsək də, yenə də hücuma qoşuldum. Hamı məndən başla qol gözləsə də, son 3 qolumu ayaqla vurmuşam. Əsas odu ki, mən qol vurduğum oyunlarda “Qarabağ” uduzmur. Əslində, işim rəqibə qol vurmağa imkan verməmək olsa da, bilirəm ki, özümün də qol vurmağımı gözləyirlər. Nə deyim? İnanıram ki, final mərhələsində daha çox qol vuraram. Amma əsas odu ki, qol buraxmayaq. Mən vurmasam da olar. Final mərhələsindəki əsas hədəfimiz ən azından indiki mövqeyimizi qorumaqdı. Zənnimcə, çox gərgin oyunların şahidi olacağıq. Hər bir qələbənin çox böyük əhəmiyyəti olacaq. Qeyd etdiyimiz kimi, Premyer Liqanı ən azı 3-cü pillədə bitirib, avrokuboklara vəsiqə qazanmaq istəyirik”.
