3 mart 2011 13:46
Saşa Yunisoğlu: Hakimlər mane olmasalar, nəticə bizim xeyrimizə olacaq
“Qəbələ”nin müdafiəçisi Saşa Yunisoğlu azerisport.az saytına müsahibəsində bu gün keçiriləcək “Bakı” ilə kubok oyunu öncəsi fikirlərini açıqlayıb.
- “Bakı” ilə kubok oyununa revanş gözüylə baxmırsız?
- Paytaxt klubunun bizi ilk altılıqdan kənar qoymasını nəzərdə tutursuz? Mən belə deməzdim. Bu, tam başqa turnirdi. Burdakı vəzifə də fərqlidi. Biz irəli getmək istəyirik.
- “Qəbələ” kubok matçına mövsümü xilas etmək baxımından son şans kimi baxır?
- Prinsipcə, elədi. Kubokda istəyimizə çata bilsək, avrokuboklara da vəsiqə qazanmış olarıq ki, belədə də mövsümü də boşa vermiş sayılmarıq. Ancaq mövsümün əvvəlindən qarşımıza hansısa belə bir vəzifə qoyulmayıb.
- Yeri gəlmişkən, Toni Adams da bunu tez-tez dilə gətirir ki, qarşınıza heç bir vəzifə qoyulmayıb. Düşünmürsüz ki, məhz bu, komandanı çox arxayınlaşdırır?
- Bunu deyirsə, deməli daha yaxşı bilir. Mən düşünmürəm ki, bu, bizi arxayınlaşdırır. Bizim idman maraqlarımız hər şeydən üstündü. Əgər birinci altılıq yox, yeddilik olsaydı, onda hər şey tam fərqli olardı. “Qəbələ” AZAL və “Bakı”dan zəif deyil. Liderlərlə də bərabər oyun sərgiləyə bildik. Bizi arxayınlaşdıran əsas məqam o oldu ki, daha çox rəqiblərin xalını düşündük, öz xallarımızı yox. Nəticədə biz özümüzküləri itirdik, rəqiblərimiz isə yox.
- Siz bakılılara bu mövsüm iki dəfə yenilmisiz. Bu dəfəki görüşdən nə gözləyirsiz?
- Əgər bu iki oyuna diqqət yetirsək, görərik ki, həmin matçlarda rəqibimizdən daha çox hakimlərin xidməti olub. Əgər hakimlər mane olmasalar, nəticə bizim xeyrimizə olacaq.
- Azərbaycan yığmasının demək olar ki, bütün üzvləri ilk altılıqdadı, siz isə ikinci altılıqda mübarizə aparmalı olacaqsız...
- “Turan”dan Vurğun Hüseynov da həlledici mərhələdən kənarda qalmış oldu. Nə etmək olar? Mənim komandam “Qəbələ”di: o hara, mən də ora. Amma təbii ki, ölkənin aparıcı klublarına qarşı mübarizədən kənarda qalmaq heç də xoş deyil.
- Bu fakt sizin yığma karyeranıza təsir göstərməyəcək?
- Bunu indidən demək olmaz. Başlıcası odu ki, mən komandamın əsas heyət oyunçularındanam. Berti Foqts da daha çox buna diqqət yetirir. Ehtiyatda otursaydim, onda daha pis olardı.
- İkinci altılıqdakı əsas məqsədiniz nədən ibarətdi?
- Artıq ikinci altılıq oyunlarına növbəti mövsümə hazırlığın birinci mərhələsi kimi baxırıq. Hansı ki, gələcək mövsüm məqsədlərimiz, vəzifələrimiz daha böyük olacaq. Yəqin ki, məşqçilər korpusu yeni futbolçulara da şans verməyə çalışacaq.
