4 mart 2011 14:40
“Bizi bir-birindən çətin 10 final oyunu gözləyir”
“Qarabağ” Premyer Liqanın “altılıq” mərhələsinə hazırlıq məqsədiylə yollandığı Antalyada təlim-məşq toplanışını davam etdirir. Azerisport.az xəbər verir ki, komandanın aparıcı oyunçularından olan Vüqar Nadirov məhz bu hazırlıq prosesi, eləcə də cari mövsümkü çıxışları və qarşıdakı həlledici oyunlardan danışıb:
“Hazırlığımız yaxşı gedir. Final mərhələsinə 3-cü pillədə qədəm qoymağımız da bizə əlavə ruh yüksəkliyi gətirib. Bəlkə də çoxları bizdən son 3 oyunda qələbə gözləsə də, 2 darmadağın gözləmirdi. Amma biz başımızı aşağı salıb öz işimizlə məşğuluq. Çempionatın startında zədələrdən əziyyət çəkmişdik. Üstəlik, iyunun əvvələrindən dayanmadan oynayırdıq. Amma qışda yaxşı hazırlaşdıq. Üstəlik, zədəlilərimiz sağaldı, yeni transferlərlə gücləndik. Demək olar ki, bütün mövqelərdə ən azı 2 futbolçumuz var. Son oyunlarda yaxşı formada olmağıma gəlincə, təkcə mən yox, bütün komanda yaxşı formadadı. Belədə hamının işi asanlaşır. Düzdü, 2 ötürmə vermişəm. Amma qol vurmaq üçün də imkanlarım oldu. Düzdü, hücumçunun işi qol vurmaq olsa da, əsas komandanın qələbəsidi. Kimin vurmasının elə də önəmi yoxdu.
Final mərhələsinə də ciddi hazırlaşırıq. Bizi bir-birindən çətin 10 final oyunu gözləyir. Hər qələbənin böyük əhəmiyyəti var. İnşallah, qələbə seriyasını davam etdirmək istəyirik.Bilirik ki, hamı bizim avrokuboklarda çıxış etməyimizi istəyir. Bu bizim məsuliyyətimizi artırır. Amma komandamıza inanırıq. Çempionatı ilk 3-lükdə bitirsək əla olar”.
