4 mart 2011 15:32
Hafiz Məmmədov: O, mənim sevimli oyunçumdu
“Bakı”nın prezidenti Hafiz Məmmədov bu gün AFFA-da keçirilən konfrans zamanı azerisport.az saytının bəzi suallarını cavablayıb.
- “Bakı”nın son oyunlardakı çıxışını necə dəyərləndirərdiz?
- Ötən il komanda çox pis oynadı və buna görə xeyli xal itirmişik. Ancaq hazırkı baş məşqçimiz Aleksandr Starkova böyük ümidlər bəsləyirik. Demək olar ki, yeni komanda yaradırıq. Komandanın daha yaxşı səviyyəyə gəlməsi üçün vaxt lazımdı.
- Kubokun “Qəbələ” ilə son oyunu xoşunuza gəldi?
- Razı qalmadım, amma heç-heçə sərfəli nəticədi. Ona görə ki, “Qəbələ” bu mövsüm çox inamlı oynayır. Həm də bizim komanda oyundan-oyuna özünə gəlir, baş məşqçimizin öz ideyalarını həyata keçirməsi üçün vaxta ehtiyac var. Hamımız çalışırıq ki, “Bakı” qələbələri ilə bizi sevindirsin.
- Jaba və Roşanı bağışlamağınıza nə səbəb oldu?
- Onlar komandanın təlim-məşq toplanışına heç də öz günahları ucbatından gecikməmişdilər. Səfər zamanı müəyyən problemlərlə üzləşmişdilər. Yol yaxın deyil və buna görə də onlar komandanın düşərgəsinə lazımı vaxtda qoşula bilməmişdilər. Onların hər ikisinə mən böyük ümidlər bəsləyirəm. Hesab etdim ki, onlara bir şans da vermək lazımdı. Hər ikisi komanda qarşısında üzr istədilər. Gizlətməyəcəm: Jaba mənim sevimli oyunçumdu. Ötən mövsüm o, çox gözəl oynamışdı.
- “Neftçi” – “Xəzər Lənkəran” oyununa baxdınız?
- Baxa bilmədim. İşimlə əlaqədar ölkə xaricində idim. Amma mənə deyiblər ki, hər iki komanda möhtəşəm oyun sərgiləyib. Bu, çempionatdakı rəqabətə kömək edə bilər. Bilirəm ki, “Bakı”ya çətin olacaq, amma yenə ümidimi itirmirəm.
- Hesab etmirsiz ki, kubokda daha çox şansınız var?
- Hər iki cəbhədə şanslarımız qalır. Çempionatda 10 tur qalıb, kubokda isə hələ yarımfinala vəsiqə qazanmamışıq.
- Vinfrid Şeferin komandadan gec ayrılmasına nə səbəb oldu?
- O, “Bakı”dan özü ayrıldı. Çünki komanda çox çətin vəziyyətdə idi.
- Tunc Afşar komandada qalacaq?
- O, “Bakı”dakı işini davam etdirir. Afşar beynəlxalq əlaqələrin qurulmasında bizə yardımçıdı. Çünki yaxşı əlaqələri var.
