5 mart 2011 13:45
Ramiz Məmmədov: Azərbaycanlı oyunçuların Atırau`ya gəlişinə imkan vermədilər
Qazaxıstanın “Atırau” klubunun azərbaycanlı baş məşqçisi Ramiz Məmmədov azerisport.az saytına müsahibəsində mövsüm öncəsi komandasının durumunu dəyərləndirib.
- “Atırau”nun çempionata hazırlığı necə keçdi?
- Təlim-məşq toplanışı yüksək səviyyədə keçdi. Komanda üçün ideal şərait yaradılmışdı. Son yoldaşlıq oyununda birinci divizion təmsilçisi “Çesna” ilə qarşılaşdıq. Bu oyunda 1:0 hesabıyla qələbə qazandıq. Çempionatın startı ərəfəsində bu qələbə bizə inam qazandırmış oldu.
- Əvvəllər, siz “Atırau”da azərbaycanlı futbolçuların da olacağını deyirdiz. Nə səbəbə bu baş tutmadı?
- Mənim maraq dairəmə düşən futbolçular arasında azərbaycanlılar, həmçinin Azərbaycanda oynamış, oynayan legionerlər də var idi. Onların bəzilərinin klublarıyla müqaviləsi var idi. Yığmadan da futbolçular var idi. Təəssüf ki, onların Qazaxıstana gəlişi mümkün olmadı. Klubları onları buraxmadı. Yəqin ki, klub rəhbərləri söhbətin kimlərdən getdiyini bilir. Ad çəkməyəcəm. Ancaq mümkündü ki, onlar yayda Qazaxıstana gəlsin. Fikrimcə, həmin vaxt bu mümkün olacaq.
- Qazaxıstan çempionatı barədə nə öyrənə bilmisiz?
- Burdakı çempionatın sistemi elə bizdəkinə oxşardı. Mövsümün sonunda medallar uğrunda 6 komanda yarışır. Qalanları elitada qalmaq üçün mübarizə aparır. Bizim ilk vəzifəmiz birinci altılığa düşməkdi. Ötən mövsüm “Qəbələ”ylə bu vəzifə uğrunda çalışırdım, indi də burda, Qazaxıstanda eyni şey təkrarlanacaq.
- Birinci oyununuz “Aktobe”yə qarşı olacaq. Debüt asan olmayacaq, elə deyilmi?
- Bu komanda çempionatın əsas liderlərindən biridi. Demək olar ki, bu ölkənin ən güclü komandalarından biri ilə oyunla başlayırıq. “Aktobe”nin çox güclü heyəti var. Qarşımıza böyük vəzifələr qoyulub. Dəqiq heç nə deyə bilmərəm, amma biz qorxmuruq. Bu oyunda da qarşımıza qələbə qazanmaq vəzifəsini qoymuşuq. Çempionata qələbəylə başlamağı çox istəyirik.
- Ancaq matç səfərdə keçiriləcək. Qələbə qazanmaq ikiqat çətin olacaq...
- Türkiyə toplanışı zamanı Qazaxıstan klubları haqda müəyyən informasiya toplaya bilmişəm. Ona görə də düşünürəm ki, böyük çətinlik olmayacaq. Baş məşqçi kimi komandanın transferlərindən razıyam. Klub rəhbərliyi sağ olsun ki, bütün arzularımızı reallaşdırıb. Ona görə də biz artıq birinci turdan qələbəylə başlamaq istəyirik. Qazaxıstan çempionatında böyük rəqabət var. Futbola böyük pullar yatırılır. Ona görə də asan oyunlarımız olmayacaq.
- “Atırau”nun ilk altılığa düşmək şansarını necə dəyərləndirirsiz?
- Biz buna hazırlaşmışıq. Düşünürəm ki, öz arzularımızı gerçəkləşdirə biləcəyik. Axı biz həm də avrokuboklara vəsiqə qazanmalıyıq. Ancaq hələ bu haqda danışmaq tezdi. Öncə komandanı altılığa çıxarmalıyıq. Hələ mövsüm başlamamış onun nəticələrindən danışmaq düz çıxmır.
