5 mart 2011 20:25
Rail Məlikovla Arif Əsədov Sadıq Sadıqova hesabat verdi
Bu gün - martın 5-də "Neftçi"nin rəhbərliyi, komandanın məşqçilər heyəti və futbolçularla görüşüb. Toplantıda "Neftçi" PFK-nın prezidenti Sadıq Sadıqov komandanın ölkə kubokunun 1/4 final mərhələsinin ilk qarşılaşmasında üstün oyun nümayiş etdirməsinə baxmayaraq, məğlubiyyətə uğradığını bildirib.
Sadıq Sadıqov bu məğlubiyyətdən nəticə çıxarmağın vacibliyini məşqçilər və futbolçuların diqqətinə çatdıraraq, təkrar matçda, eləcə də Premyer Liqanın qarşıdakı görüşlərində komandamızın məzmunlu oyunu ilə azarkeşlərə qələbə sevinci yaşadacağına əminliyini vurğulayıb.
Görüşdə "Neftçi"nin baş məşqçisi Arif Əsədov göstərilən etimada görə klub prezidenti Sadıq Sadıqova təşəkkürünü bildirib. Baş məşqçi klub rəhbərinin tapşırığına əsasən "Neftçi"də yerli və gənc perspektivli futbolçulara üstünlük verildiyini, son vaxtlar klubda işlərin peşəkar səviyyədə qurulduğunu qeyd edib. Arif Əsədov məhz bu işlərin davamı olaraq "B" komandasının yaradılmasının önəmliyini söyləyərək, gələcəkdə burada əsas komandaya yerli gənc futbolçuların hazırlanacağına inandığını bildirib.
Sonra "Neftçi" klubunun kapitanı Rail Məlikov danışaraq, alınan son məğlubiyyətin bir daha təkrarlanmayacağı üçün futbolçuların meydanda sonadək mübarizə aparacaqlarını qeyd edib. Rail Məlikov, həmin qarşılaşmanın 79-cu dəqiqəsində əvəz olunarkən baş verən hadisə ilə də bağlı fikirlərini bildirib: "Həmin anda məğlub durumda olduğumuz üçün çox əsəbi idim. Bilirsiniz ki, futbolçular əvəz olunarkən əynindəki formanı çıxarıb inzibatçıya təhvil verir, əvəzində isə isti paltar alır. Mən də öz növbəmdə formamı çıxararaq inzibatçıya vermək istədim. İnanırsınız, əsəbi olduğuma görə həmin anı heç xatırlamıram da. Mən "Neftçi" kimi tarixi olan bir komandanın kapitanıyam və heç bir zaman onun atributlarına hörmətsizlik etmərəm. Uşaqlıqdan bu komandanın azarkeşi olmuşam və əgər hər hansı səhvim varsa, ürəyi "Neftçi" ilə döyünənlərdən üzr istəyirəm" – deyə Rail Məlikov bildirib.
Görüşün sonunda klub prezidenti Sadıq Sadıqov hər zaman komandaya dəstək olacağını və "Neftçi"nin gələcək görüşlərdə qələbələrini sıralayacağını vurğulayıb.
