5 mart 2011 21:11
Xəzər Lənkəran`dan Neftçi`yə
Tanınmış həkim Boris Xetaqurov yenidən "Neftçi"yə qayıdıb. Azerisport.az xəbər verir ki, o, bundan sonra "Neftçi" klubunda Tibbi bərpa mərkəzinin baş həkimi vəzifəsində çalışacaq.
Təcrübəli həkim ona göstərilən etimada görə klub rəhbərliyinə minnətdarlığını bildirib: "Azərbaycanın ən köklü klubu olan "Neftçi" mənə çox tanış, doğmadı. Uzun müddət işlədiyim bu komandanı çox yaxşı tanıyıram. Təklif aldıqdan sonra klubun prezidenti Sadıq Sadıqovla görüşdüm. Danışığımız müsbət nəticələndi. Mənə göstərdiyi böyük etimada görə ona minnətdaram. Çalışacağıq ki, "Neftçi"nin bütün komandalarında tibbi məsələlər yüksək peşəkar səviyyədə olsun".
Boris Xetaqurov 1964-cü ildə Azərbaycan Dövlət Tibb İnstitutunu bitirib. Elə həmin ildən başlayaraq, 40 il müddətində "Neftçi"də çalışıb. O, 1966-cı ildə SSRİ çempionatının bürünc medalını qazanan komandamızda olub. Xetaqurov həmçinin, AFFA-nın Tibb Komitəsinin sədri və Azərbaycan milli komandasının, eləcə də bir neçə Azərbaycan klubunun həkimi işləyib. Xetaqurov Azərbaycanın əməkdar məşqçisi, idman tibbində yüksək kateqoriyalı həkim, "MDB ölkələrinin İdman Həkimləri Birliyi"nin üzvüdür. Həmyerlimiz 2008-ci ildə Almaniyada dünyada məşhur həkim olan professor Pfayferin Tibbi Mərkəzində idman həkimlərinin dərəcəsinin artırılması kursunu bitirib. Xetaqurov hələ 1985-ci ildə idmançıların fiziki işgüzarlığının artırılması vasitəsinin ixtirasına görə müəllif hüququ alıb.
Qeyd edək ki, Xetaqurov son dövrlərə kimi uzun müddət idi ki, “Neftçi”nin əzəli rəqibi “Xəzər Lənkəran”da çalışırdı. Lakin Mirça Rednik onunla işbirliyindən imtina etdikdən sonra Xetaqurov da işsiz qaldı.
