6 mart 2011 14:42
İbrahim Karqbo: Şeferə minnətdaram ki, məni Bakı`ya gətirdi
“Bakı”nın yarımmüdafiəçisi İbrahim Karqbo azerisport.az saytına müsahibəsində baş məşqçi dəyişikliyindən danışıb, “Qəbələ” ilə kubok oyunlarından, eləcə də cari mövsüm üçün qarşılarına qoyulan vəzifədən danışılıb.
- Siz “Bakı”da Vinfrid Şeferin yeganə “miras”ı olaraq qalmısız. Komandada necə möhkəmlənə bildiniz?
- Öz oyunumla. Şeferə minnətdaram ki, məni “Bakı”ya gətirdi. İlk gündən öz üzərimdə işləyirəm, daha yaxşı olmağa çalışıram. Əgər mənə əsas heyətdə güvənirlərsə, deməli, buna layiqəm.
- Almaniyalı mütəxəssisin artıq komandada olmamasına təəssüflənmirsiz?
- Məşqçi işi elədi ki, bu gün burdasan, sabah digər yerdə işləyə bilərsən. Bu, futboldu.
- Sizə yeni baş məşqçi Aleksandr Starkovla çalışmaq çətin deyil ki?
- Bizim hamımız üçün yeni baş məşqçiylə dil tapmaq asan oldu. Düzdü, biz hələlik öz ideal oyunumuzu göstərə bilmirik. Fikrimcə, ilk altılıqda biz tam fərqli “Bakı” görə biləcəyik.
- “Qəbələ” ilə ilk kubok oyununuzu necə dəyərləndirərdiz?
- Oynamaq bir qədər çətin idi, çünki qar yağırdı. Amma bütövlükdə qolsuz heç-heçə bizim üçün sərfəli nəticədi. Bu, bizə yarımfinala çıxmağa kömək edə bilər. Axı kubok avrokuboklara ən yaxın yoldu.
- Artıq çempionatı hesablarmırsız?
- Niyə ki? Qarşıda 10 tur var.Əgər biz hər oyunda qələbə qazansaq, çox şeyə nail ola bilərik.
- Hiss etmirsiz ki, “Qəbələ” çempionatda ilk altılığı sizə uduzmasının revanşını almaq istəyir?
- Onlar həmişə fədakar oyun sərgiləyirlər. “Qəbələ” əla komandadı və Bakıda da bizi qətiyyən asan oyun gözləmir.
- Sizə elə gəlmir ki, belə oyunla “Bakı” çox şeyə nail ola bilməz?
- Komandaya vaxt lazımdı. Axı bizdə baş məşqçi dəyişikliyi olub. Bu fasilə bizə çox kömək edəcək. Səhvlərimizi analiz edə biləcəyik.
