8 mart 2011 11:40
Tuyqun Nadirov: Rövnəq Abdullayevə cavab vermək hüququm yoxdu
“Xəzər Lənkəran” klubunun vitse-prezidenti Tuyqun Nadirov azerisport.az’a müsahibəsində komandanın baş məşqçisi Mirça Rednikə kəsilən cəzadan və ölkə kuboku çərçivəsində “Neftçi” ilə keçiriləcək oyundan danışıb.
- Komandanın başqçisinin beş oyunluq cəzasını necə qarşıladınız?
- Bu məsələ ilə əlaqədar artıq AFFA-nın apellyasiya komitəsinə müraciət etmişik. “Neftçi” ilə oyunda Rednik hakimlərə qarşı heç nə etməyib. O, sadəcə kepkasını çıxarıb qarşısında yerə çırpıb. Rumın mentaliteti bizim mentalitetdən fərqlənir. Həmçinin bəzi sarı vərəqələrlə razı deyilik.
- Hər dəfə azarkeşlərə görə cərimə ödəmək sizi bezdirməyib ki?
- Bunda azarkeşləri təxribata sövq edən hakimlər təqsirlidir. Hakimlərimiz hələ bu çoxsaylı kütlə qarşısında idarəçiliyə hazır deyillər. Belə hallarda onlar daha da məsuliyyətli olmalıdır. Çoxsaylı azarkeşlər olan yerdə bənzər hadisələr baş verir. Bu, normaldır. “Neftçi” ilə son oyunda Lənkəranda onlara 770 oturacaq ayırmışdıq. Oyundan sonra oturacaqların yarısı yerində yox idi. Bizim nizam-intizam komitəsi necəsə düzgün işləmir. “XL” təkrar hallara görə digər klublardan daha çox cərimələyirlər.
- Bununla belə klub rəhbərliyi bu istiqamətdə iş aparır, yoxsa belə hallar sizi qətiyyət narahat etmir?
- Sözsüz, iş aparılır. Nə qədər iş aparılsa da, oyun vaxtı sevimli komandana qarşı ədalətsizliyi görəndə hissləri cilovlamaq çətindir. Fan-klubları təşkil edəndə biz hər kəsi bura götürmürük. Bizim digər klublardakı kimi yapışqan iyləyib sonra oyuna gələn azarkeşlərimiz yoxdu.
- İlk oyunun nəticəsi (4:3) komandanı rahatlaşdırmaz ki?
- Rahatlaşdırmamalıdır. Futbolçularımız vəziyyətdən asılı olmayaraq Lənkəranda başqa əsasla oynayırlar.
- AFFA prezidenti Rövnəq Abdullayev sizin ünvanınıza “Tuyqun “XL” qələbə qazananda da narazıdır” cümləsini işlədib...
- Ona böyük hörmət bəsləyirəm və məsul işlərində etdiklərinə görə minnətdaram. Onun fikrinə hörmətlə yanaşıram və ona cavab vermək hüququndadeyiləm. Ancaq istəyirəm ki, adamlar AFFA prezidentinə hesabatda faktları təhrif etməsinlər.
