10 mart 2011 16:18
Kamran Ağayevdən yeni rekord
Azərbaycan kubokunun 1/4 final mərhələsinin “Neftçi” ilə cavab oyunu Kamran Ağayev üçün əlamətdar olub. Azerisport.az xəbər verir ki, “Xəzər Lənkəran”ın qapıçısı 1:1 hesabı ilə bitən matça kapitan sarğısı ilə çıxıb ki, bununla da rekord müəllifi olub.
Məsələ burasındadı ki, Ağayev karyerasında 59-cu dəfə matça “Xəzər Lənkəran”ın kapitanı kimi çıxıb. Bununla da o, Mahmud Qurbanovun rekordunu təkrarlayıb. İlk dəfə komandanın kapitan sarğısını ötən mövsüm daşıyan qapıçı həmin – 2009/10 mövsümündə 36 dəfə bu şərəfə nail olmuşdu: 30 çempionat və 6 kubok matçı. Cari mövsüm isə Avroliqanın 2, çempionatın 19 və kubokun 2 matçında Kamran komandasını arxasınca meydana çıxarıb. Bununla da Mahmuda məxsus rekord təkrarlanıb. Lakin ikihakimiyyətlilik elə bu həftə başa çata bilər. Çünki növbəti oyunda bu qapıçı “Xəzər Lənkəran” tarixinin vahid rekordçu-kapitanı kimi tarixə düşəcək.
Qeyd edək ki, bu günə qədər 250 dəfə meydana çıxan “Xəzər Lənkəran”ın tarixinə 18 kapitan düşüb. Düzdü, klub tarixində 250 yox, 251 matç var. Lakin onlardan biri “Şəfa” üzərində texniki qələbə (2004/05 mövsümü, çempionat) olduğundan yalnız 250 dəfə kapitana ehtiyac olub.
